किरण मानन्धरको विशेष चित्रकला प्रदर्शनी सुरु

काठमाडौँ । ठमेलस्थित म्युजियम अफ नेपाली आर्टमा किरण मानन्धरको विशेष चित्रकला प्रदर्शनी सुरु भएको छ । 

आगामी सेप्टेम्बरसम्म सञ्चालन हुने प्रदर्शनीमा प्रत्येक दिन बिहान १० बजेदेखि साँझ ६ बजेसम्म अवलोकन गर्न पाइनेछ ।

प्रदर्शनीको उद्घाटनमा एक सयभन्दा बढी कलाप्रेमीहरुको उपस्थिति थियो । चित्रकला अवलोकनपछि प्राडा अभि सुवेदीले आफूले कैयौँ पटक मानन्धरका चित्रकलाबारे समीक्षा लेखेको उल्लेख गर्दै किरण मानन्धरका चित्रकलामा आफूले लचकता पाउने गरेको बताउनुभयो । 

“किरण मानन्धरका चित्रकलामा ‘ब्रस स्ट्रोक’ निकै कलात्मक देखिन्छन्, रङ्गको मिश्रण बेजोड हुन्छ, चित्र हेर्दा सुमधुर सङ्गीत झैँ लाग्छ”, उहाँले भन्नुभयो, “मैले उहाँका कैयौँ चित्रकला हेरेको छु, उहाँ नेपालको सम्भवतः सबैभन्दा बढी चित्र कोर्ने कलाकारमा पर्नुहुन्छ, उहाँका सृजनामा प्रत्येक पटक नयाँपन भेट्छु, आज पनि नयाँपन पाएँ ।” 

एनसेल फाण्डेसनको सहकार्यमा सुरु प्रदर्शनीमा कलाकार किरण मानन्धरले अवलोकनकर्तासँग साक्षात्कार गर्दै अनुभव सुनाउनुभयो । उहाँले यस प्रकारका प्रदर्शनीले नेपाली कला र संस्कृतिको प्रवर्द्धन र विकासमा महत्वपूर्ण भूमिका खेल्ने धारणा राख्नुभयो । विशेष गरी नयाँ पुस्तामा ज्ञान, सीप र कला हस्तान्तरणमा यसले भूमिका खेल्ने उहाँको भनाइ थियो । 

“मैले यस प्रकारका प्रदर्शनी कैयौँ पटक आयोजना गरेको छु, यसबाट दर्शकहरूसँग साक्षात्कार गर्ने अवसर प्राप्त हुनुका साथै कला र संस्कृतिबारे ज्ञान साट्ने अवसर प्राप्त हुन्छ”, उहाँले भन्नुभयो ।

प्रदर्शनीमा मानन्धरले विभिन्न कालखण्डमा कोर्नुभएका चित्रकला अवलोकन गर्न पाइने आयोजक म्युजियम अफ नेपाली आर्टका प्रमुख क्युरेटर राजन शाक्यका बताउनुभयो । नेपाली कला र संस्कृति, परम्परा, धर्म, महिला तथा प्रकृतिसँग सम्बन्धित विभिन्न चित्रकला प्रदर्शनीमा राखिएका छन् । अवलोकनकर्ताले प्रदर्शनी अवलोकनका साथे चित्रकला खरिद समेत गर्न सक्नेछन् । 

त्यस अवसरमा चित्रकलाहरूको सँगालो भएको पुस्तक पनि सार्वजनिक गरिएको थियो ।