बाढीले कुलो बगाउँदा लेलेपका दुई सयभन्दा बढी परिवार विद्युत् सेवाविहीन, मर्मत सुरु

ताप्लेजुङ। ताप्लेजुङको फक्ताङलुङ गाउँपालिकाका वर्षासँगै बिहीबार आएको बाढीले क्षति पुर्‍याएका लघु जलविद्युतको मर्मतको काम आज देखि सुरु भएको छ ।

गाउँपालिका वडा न-६ लेलेपको थाक्पाखोलामा आएको बाढीले लघु जलविद्युतको कुलो बगाउदा दुई सय बढी घरपरिवार विद्युत् सेवाबाट वञ्चित बनेसँगै मर्मतका काम सुरु भएको हो । लेलेपको थाक्पाखोलामा आएको बाढीले एक सय ५० मिटर भन्दा बढी कुलो बगाएसँगै विद्युत् सेवा अवरुद्ध भएको थियो ।

 विद्युतको कुल मर्मतका लागि एक महिना बढी समय लाक्न सक्ने वडाध्यक्ष पेम्बा टाँसी शेर्पाले जानकारी दिनुभयो । पहरामा ड्रिलिङ र आरसीसी गरेर कुलो जोड्नु पर्ने भएकोले मर्मतमा समय लाग्ने भएको छ । विद्युत् सेवा अवरुद्ध हुँदा स्थानीय एक महिना बढी अँध्यारोमा बस्न बाध्यता रहेको समेत अध्यक्ष शेर्पा बताउनुहुन्छ ।  

कुलो मर्मतका लागि २० लाख रुपैंया लाग्ने भएकोले यसका लागि पालिकाको विपत् व्यवस्थापन कोषबाट पाँच लाख, रिभर साइड हाइड्रो पावर कम्पनीले फलामको रड उपलब्ध गराउने र पालिकाले दिएको पैसाले सिमेन्ट, बालुवा व्यवस्थापन गर्ने र बाँकी काम जनश्रमदान गर्ने अध्यक्ष शेर्पाको भनाई छ । 

यता सो दिन नै आएको बाढीले ओलाङचुङगोला जाने सडक, लावाजिन जाने पैदल यात्रीका लागि बनाइएका दुईवटा आरसीसी पुल बगाएको र लावजी र टाँसी गाउँ जोडने झोलुङ्गे पुलमा क्षति पुर्याएको र सो क्षेत्रको कृषि सडक पनि बाढीले बगाएको अध्यक्ष शेर्पाको भनाई छ । बाढीले ओलाङचुङगोला जाने काठे पुलमा क्षति गरेसँगै यातायात सेवा अवरुद्ध भएको छ । 

थाक्पाखोलाबाट तीन वर्षअघि ५२ किलोवाट विद्युत् उत्पादन गरिएको थियो । यसले २ सय ६२ घरधुरीलाई विद्युत् सेवा उपलब्ध गराउँदै आएको थियो । सो क्षेत्रमा राष्ट्रिय प्रसारण लाइन पुगेको छैन ।