पत्रकार माथिको आक्रमण प्रदेश सरकारको लागि सह्य हुँदैन : मुख्यमन्त्री सिंह

जनकपुरधाम । नेपाल पत्रकार महासङ्घ मधेश प्रदेश समितिले मधेश प्रदेशका मुख्यमन्त्री सतिश कुमार सिंहलाई पत्रकार हत्या तथा सञ्चार माध्यममाथि भइरहेको आक्रमणका दोषीमाथि कारवाहीको माग गदै आज ज्ञापनपत्र बुझाएको छ । महासङ्घका प्रदेश अध्यक्ष श्याम बन्जारा नेतृत्वको टोलीले मुख्यमन्त्री मार्फत प्रधानमन्त्रीलाई ज्ञापनपत्र बुझाएको हो ।

पूर्व राजावादी पक्षधरले आयोजना गरेको प्रदर्शनका क्रममा एभिन्युज टेलिभिजनका क्यामरा म्यान पत्रकार सुरेश रजकको बीभत्स हत्या सहितको सञ्चार माध्यममाथि भएको आक्रमणमा सङ्लनमाथि कडा कारवाहीको माग ज्ञापनपत्रमा गरिएको छ ।

मुख्यमन्त्री सिंहले पत्रकारहरू माथिको कुनै प्रकारका हिंसाका विपक्षमा प्रदेश सरकार रहेको बताउनुभयो । उहाँले पत्रकारहरूले गरेको मागअनुसार भोलि नै प्रधानमन्त्री कहाँ मागपत्र पठाइने जानकारी दिनुभयो । 

यस अघि नेपाल पत्रकार महासङ्घ धनुषाले प्रमुख जिल्ला अधिकारी रामुराज कडरीया मार्फत प्रधानमन्त्रीलाई ज्ञापनपत्र बुझाएको थियो ।