तीनकुने घटनामा संलग्न कसैले पनि उन्मुक्ति नपाउने: प्रधानमन्त्री ओली
काठमाडौँ। प्रधानमन्त्री केपी शर्मा ओलीले तीनकुनेमा चैत १५ गते भएको घटनामा संलग्न कसैले पनि उन्मुक्ति पाउन नहुने र नपाउने बताउनुभएको छ ।
संघीय संसद्को दुवै सभाको छुट्टा छुट्टै बैठकमा आज सम्बोधन गर्दै प्रधानमन्त्री ओलीले यही गत १५ गतेको पूर्व राजावादीहरूको आन्दोलनको क्रममा भएको घटनाको जिम्मेवार तत्कालीन राजा ज्ञानेन्द्र शाह देखिएकाले उन्मुक्ति नपाउने बताउनुभयो ।
प्रधानमन्त्री ओलीले घटनामा संलग्नहरूमाथि छानबिन सुरु भएको छ र प्रारम्भिक अध्ययन अनुसार तत्कालीन राजा शाहले संविधानसभाको ऐतिहासिक निर्णयपछि भएको सम्झौताको उल्लङ्घन गरेको स्पष्ट भएको बताउनुभयो ।
प्रधानमन्त्री ओलीले आन्दोलनका क्रममा राजवादीहरूले व्यक्तिको घर, सार्वजनिक भवन, सञ्चार गृह, पार्टी कार्यालय, औषधि कारखाना र सवारीका साधन तोडफोड गर्ने, आगजनी गर्ने र डिपार्टमेण्टल स्टोरहरू लुटपाट गर्ने निजी व्यक्तिको घरमा आगजनी र मानिसलाई थुनेर जिउँदै डढाउने जस्ता कार्य निन्दनीय र खेदजनक भएको बताउनुभयो ।
प्रधानमन्त्री ओलीले केही दिनयता एकजना कर्मचारीको विषयमा प्रश्न उठेको र सदन अवरुद्ध हुँदा महत्वपूर्ण संसदीय कार्यमा बाधा पुगेको बताउनुभयो ।
उहाँले नेपाल विद्युत् प्राधिकरणका कार्यकारी निर्देशक कुलमान घिसिङको विषय अदालतमा विचाराधीन रहेकाले थप चर्चा परिचर्चा गर्न विधिसम्मत नरहेको बताउनुभयो ।
उहाँले सुशासन र त्यसमा कमजोरी भएमा प्रश्न उठ्नु स्वभाविक भएको, सरकारका कामकारबाहीप्रति प्रश्न उठाउने वा समर्थन गर्ने स्थल भएपनि राष्ट्रसेवक कर्मचारीहरूको गुण/दोष टिप्पणी गर्ने स्थल चाहिँ संसद् हो भन्ने आफूलाई नलाग्ने बताउनुभयो ।
राष्ट्रसेवक कर्मचारीहरूको गुण/दोष टिप्पणी गर्ने र हेर्ने प्रक्रिया रहेको र राम्रो काम गर्नेलाई पुरस्कृत गर्ने र दोषीलाई कारबाही गर्ने विधि पनि यसै सदनले निर्धारण गरेको स्पष्ट पार्नुभयो ।
प्रधानमन्त्री ओलीले अहिले संविधानको रक्षा, जनताले लडेर ल्याएका अधिकारहरूको रक्षा, लोकतन्त्रको रक्षा, संघीय लोकतान्त्रिक गणतन्त्रको रक्षा र त्यसको सफल कार्यान्वयनको समय भएको र सिङ्गो सदन एक हुनुपर्ने आवश्यकता रहेको बताउनुभयो ।
प्रतिक्रिया राख्नुहोस्