स्वर्ण पदक विजेता भुजुलाई नगदसहित सम्मान

भक्तपुर । जुद्ध वारुण यन्त्र कार्यालय भक्तपुरले कार्यालयका फायर म्यान रहेका स्वर्ण पदक विजेता खेलाडी शिरुष भुजुलाई नगदसहित सम्मान गरेको छ ।

यहीँ फागुन १५ गतेदेखि १९ गतेसम्म महोत्तरी जिल्लाको गौशालामा सञ्चालन भएको १८ औ राष्ट्रव्यापी बुढाकैदो फुलकन्टयाक कराँते प्रतियोगिता २०८१ मा स्वर्ण पदक हासिल गरि कार्यालयको प्रतिष्ठा बढाएको भन्दै जुद्ध वारुण यन्त्र कार्यालय भक्तपुरका प्रमुख विजयप्रसाद धौभडेलले भुजुलाई नगद रु. पाँच हजारसहित सम्मान गर्नुभएको हो ।

सम्मान गर्दै कार्यालय प्रमुख धौभडेलले एउटा फायर म्यानले पनि देशको लागि केही गर्न सक्छ र देशको नाम राख्न सक्छ भन्ने उदाहरण भुजुले प्रस्तुत गरेको बताउनुभयो । 

उहाँले यहाँका फायर म्यानहरू सामाजिक कार्यमा पनि उत्तिकै सक्रिय रहको बताउँदै उहाँले खेलकुदमा चाहना हुनेहरूलाई प्रशिक्षणका लागि कार्यालयले पठाउने गरेको बताउनुभयो ।

यहाँका फायर म्यानहरू अग्नि नियन्त्रणसँगै सामाजिक कार्यदेखि खेलमा पनि दक्ष र सशक्त रहेको बताउनुभयो । स्वर्ण पदक विजेता भुजुले कार्यालयले दिएको सम्मानले आगामी दिनमा खेलमा सक्रिय रहन थप प्रोत्साहन मिलेको बताउनुभयो ।