तपाईँ सुन्दै हुनुहुन्छः

महिला गोल्डकप इलाम : पुलिस र बागमती भिड्दै

इलाम । दोस्रो अन्तर्राष्ट्रिय आमन्त्रण महिला गोल्डकपको दोस्रो क्वाटरफाइनल खेलमा बागमती युथ क्लब सर्लाही र नेपाल पुलिस क्लब आमनेसामने हुँदैछन्। इलामको ठूलो टुँडिखेल मैदानमा यी दुई टोली पहिलो पटक भिड्न लागेका हुन्।

पछिल्लो छ महिनामा यी दुई टोली चौथो पटक प्रतिस्पर्धा गर्न लागेका हुन्। यसअघि, महिला लिगमा तीन पटक भेट हुँदा नेपाल पुलिसले दुई खेल जितेको र एक खेल बराबरी भएको थियो।

नेपाल पुलिस क्लबले १२ वर्षपछि पहिलो पटक इलाममा आफ्नो महिला टोली उतार्न लागेको हो भने बागमती क्लब पहिलो पटक इलाम आइपुगेको छ।

पहिलो चरणको खेलमा नेपाल पुलिसले कप्तान निरु थापाको गोलबाट जित निकालेको थियो। महिला लिगमा छैटौं स्थानमा रहे पनि कोशी प्रदेशले सहभागिता नजनाउँदा बागमतीले दोस्रो चरणमा मौका पाएको हो।

बागमतीको टोलीमा नेपाली उमेर समूहका केही खेलाडी रहेका छन् भने नेपाल पुलिस क्लबले फोर नेशन कपमा सहभागिता जनाएकी गोलरक्षक उषा नाथ, डिफेन्डर पूजा राना, समीक्षा घिमिरे र अमृता जैशी सहित मैदानमा उत्रनेछ।

महिला लिगमा आर्मीलाई पछि पार्दै नेपाल पुलिस दोस्रो स्थानमा रहेको थियो। यस खेलमा लिगको पहिलो चरणमा खेलेकी दीपा न्यौपाने बाहेक सबै खेलाडी उपलब्ध हुने छन्।

प्रतिक्रिया राख्नुहोस्

Back to top button