धनकुटाका शिव मन्दिरहरूमा भक्तजनको घुइँचो

धनकुटा । महाशिवरात्रिको अवसरमा धनकुटाका विभिन्न शिव मन्दिरमा भक्तजनहरूको घुइँचो लागेको छ । 

धनकुटाको विश्रान्ति मन्दिर, मधुगंगाधाम, छिन्ताङ जाल्पादेविलगायतका शिव मन्दिरमा बिहानैदेखि भक्तजनको घुइँचो लागेको हो । 

शिव मन्दिरमा दर्शन गर्न धनकुटासहित छिमेकी जिल्लाका भक्तजन मन्दिर आएका छन् । धनकुटा नगरपालिका –९ मुलघाटमा रहेको विश्रान्ति मन्दिरमा शिवरात्रिकै अवसर पारेर शिव महापुराण सञ्चालन भइरहेको छ । गत ४ गते उद्घाटन भएको महायज्ञ बिहीबार समापन हुने आयोजकले जनाएको छ । विश्रान्तिमा हालसम्म करिब एक करोडभन्दा बढी सहयोग सङ्कलन भएको विश्रान्ति महापुराण आयोजक समितिका महासचिव जनार्दन घिमिरेले बताउनुभयो ।

फागुन कृष्ण त्रयोदशी अर्थात् महाशिवरात्रिलाई हिन्दू धर्मावलम्बीहरूले भगवान् शिवको पूजा–आराधना गरी मनाउने गरेका छन् । सम्पूर्ण प्राणीहरूको हृदयमा धर्म उदय गराउने भगवान् शिवको अति प्यारो दिनका रुपमा महाशिवरात्रीलाई लिइन्छ । यस पर्वका दिन उपवास बसी रातभर जाग्राम गरेर शिवको प्रिय गाइको दूध, धतुरो र बेलपत्र चढाएमा सर्वसिद्धी लाभ भई यमलोक जानु नपर्ने धार्मिक विश्वास रहेको छ । आज भगवान् शिवलाई जाडो नहोस् भन्नका लागि प्रत्येक घर, चोक र मठ मन्दिरमा दाउरा बालेर धुनी जगाउने गरिन्छ ।