मेयर कप फुटबल: ग्रीन पिस सेमिफाइनलमा प्रवेश

नेपालगञ्ज । कोहलपुरको ग्रीनपिस मावि मेयर कप अन्तर विद्यालय छात्र फुटबलको सेमिफाइनलमा प्रवेश गरेको छ । ग्रीनपीसले पेनाल्टी सुटआउटमा आदर्श मावि राँझालाई ५–४ ले हराउँदै जीत हासिल गरेको हो ।

नेपालगञ्ज रङ्गशालामा भएको खेलमा निर्धारित समयमा खेल १–१ को बराबरीमा सकिएको थियो । ग्रीनपीसका विराज रोकायले २५औँ मिनेटमा गोल गरेर टोलीलाई अग्रता दिलाएका थिए । तर, आदर्शका खगेन्द्र थापाले ४८औँ मिनेटमा गोल गरेपछि खेल १–१ को बराबरीमा पुगेको थियो । पेनाल्टी सुटआउटमा ग्रीनपीसका विशाल थापा मगर, विराज रोकाय, डेविड तामाङ, दिपेश भण्डारी र झलक सिंहले गोल गरेका थिए ।

आदर्शका आर्यन भुजेल, आकाश सुनार, उज्ज्वल खत्री र खगेन्द्र थापाले गोल गरेका थिए । खेलमा ग्रीनपीस माविका विराज रोकाय प्लेयर अफ द म्याचबाट पुरस्कृत भए । उनलाई कोहलपुर सिटी एकेडेमीका निर्देशक प्रशान्त रिजाल र युवा व्यवसायी प्रकाश गौतमले प्लेयर अफ द म्याचको ट्रफी प्रदान गरेका थिए । यसैगरी आजको दोस्रो खेलमा धम्बोझी मावि नेपालगञ्जले पेनाल्टी सुटआउटमा आदर्श मावि नेपालगञ्जलाई ५–३ ले पराजित गर्दै क्वाटरफाइनलमा प्रवेश गरेको छ ।

निर्धारित समयको खेल २–२ को बराबरीमा सकिएको थियो । धम्बोझीका कमल विकले २०औँ र समिर मगरले ५३औँ मिनेटमा गोल गरे । आदर्श मावि नेपालगञ्जका निश्चल थापा मगरले ६१औँ र जेनिष बोहोराले ६३औँ मिनेटमा गोल गर्दै टोलीलाई खेलमा कमब्याक गराएका थिए ।

पेनाल्टी सुटआउटमा धम्बोझीका समिर मगर, प्रिन्स जिएम, सन्देश मगर, तुफान शाही, दिनेश रोकायले गोल गरे । आदर्शका निश्चल थापा मगर, राहुल श्रेष्ठ र जेनिस बोहोराले गोल गरेका थिए । खेलमा उत्कृष्ट प्रदर्शन गर्दै धम्बोझी समिर मगर प्लेयर अफ द म्याच घोषित भए । उनलाई नेक्सस इनर्जी प्रालिका निर्देशक एवम् अटोटेम्पो तथा इ–रिक्सा व्यवसायी संघ बाँकेका महासचिव कुमार सिंह ठकुरी र नेपाल पत्रकार महासङ्घ बाँकेको उपाध्यक्ष करुणा शाहले पुरस्कृत गरे ।

आजको तेस्रो खेलमा पेनाल्टी सुटआउटमा नेपालगञ्ज मोडेल एकेडेमीलाई ३–१ ले पराजित गर्दै युनाइटेड एजुकेशन स्कुल प्रतियोगिताको क्वाटरफाइनलमा प्रवेश गरेको छ । निर्धारित समयमा खेल १–१ को बराबरीमा सकिएको थियो । युनाइटेडका निक्सान सुनारले १५औँ मिनेटमा गोल गर्दै टोलीलाई अग्रता दिलाएका थिए । नेपालगञ्ज मोडेल एकेडेमीका अरुण खत्रीले ४०औँ मिनेटमा गोल गर्दै खेल बराबरी गरेका थिए ।

पेनाल्टी सुटआउटमा युनाइटेडका अवशेष रेग्मी, उत्सव सुनार र अनिष रानाले गोल गरे । नेपालगञ्ज मोडेल एकेडेमीका विकास कुमार कटुवालले मात्र गोल गरे । खेलमा उत्कृष्ट प्रदर्शन गर्दै युनाइटेडका गोलकिपर तथा कप्तान अनिष राना प्लेयर अफ द म्याच घोषित भए । उनलाई नेपालगञ्ज म्याराथनका संस्थापक टिएस ठकुरीले पुरस्कृत गरेका थिए ।

प्रतियोगिता अन्तर्गत भोलि छात्र तर्फको पहिलो क्वाटरफाइनलमा मोडर्न पब्लिक स्कुल र मनकामना मावि स्कुलले प्रतिस्पर्धा गर्नेछन् । दोस्रो क्वाटरफाइनलमा धम्बोझी र युनाटेड एजुकेशनले प्रतिस्पर्धा गर्नेछन् । यसैगरी भोलिदेखि छात्रा तर्फको पनि खेल सुरु हुने भएको छ । छात्रा तर्फको पहिलो खेलमा नेपालगञ्ज सेन्ट जेभियर्स स्कुल र धम्बोझी माविले प्रतिस्पर्धा गर्नेछन् । अर्को खेलमा युनाइटेड एजुकेशन र मनकामनाले प्रतिस्पर्धा गर्नेछन् ।

बाँके जिल्ला फुटबल सङ्घको आयोजनामा सुरु भएको प्रतियोगिताको छात्रतर्फ २१ टिम र छात्रातर्फ ६ टिमको सहभागिता रहेको छ । प्रतियोगिताको फाइनल खेल फागुन ३ गते हुनेछ ।