नारदमुनी थुलुङ स्मृति गोल्डकप : सलहेश क्लब सिराहा विजयी 

उदयपुर । उदयपुरको चौदण्डीगढी नगरपालिका–४ बसाहामा जारी दशौँ संस्करणको नारदमुनी थुलुङ स्मृति गोल्डकप फुटबल प्रतियोगितामा एलएक्स सिटी फुटबल क्लब मोरङलाई २–१ गोल अन्तरले हराउँदै सलहेश युवा क्लब विजयी भएको छ ।

खेलको पहिलो हाफको २३औँ मिनेटमा सलहेश युवा क्लब जर्सी नम्बर ७ का श्याम मुर्मुले गोल गर्दै आफ्नो टिमलाई सरुवाती अग्रता दिलाए । तर पहिलो हाफकै ४०औँ मिनेटमा एलएक्स सिटी फुटबल क्लब मोरङ जर्सी नम्बर १२ का रोहन कार्कीले गोल गर्दै खेललाई बराबरीको स्थितिमा ल्याए । 

खेलको दोस्रो हाफको ६०औँ मिनेटमा सलहेश युवा क्लब जर्सी नम्बर १७ का मिलन राईले निर्णायक गोल गर्दै आफ्नो टिमलाई जित दिलाए । आजको खेलमा सलहेश युवा क्लबका मिलन राई म्यान अफ दी म्याच भएका थिए ।

भोलिको खेल न्यू त्रियुगा स्पार्टस क्लब सप्तरी र एभरेष्ट फुटबल क्लबबीच खेल हुने आयोजकले जनाएको छ ।