प्रादेशिक महोत्सव नेपालगञ्जमा कर्णालीका उत्पादन प्रति अवलोकनकर्ताको आकर्षण बढ्यो

बाँके । नेपालगन्जमा जारी लुम्बिनी प्रादेशिक महोत्सवमा कर्णालीका उत्पादनहरू अवलोकनकर्ताको आकर्षण बनेका छन् । अन्य स्टलहरूमा भन्दा महोत्सवमा राखिएका कर्णालीका उत्पादनहरू प्रति अवलोकनकर्ताले रुचि देखाएसँगै महोत्सवको आकर्षण नै कर्णालीको उत्पादन बनेको हो ।

महोत्सवमा कर्णालीमा उत्पादन भएका गाँजाको लत्ताकपडा देखि बन पाखामा पाईने जडीबुटी सम्मका सामाग्रीहरू प्रदर्शनका लागि राखिएका छन् । सल्यानको खुकुरी तरबार देखि हुम्लाको ओखर र भाङ्गो पनि मेलामा उपलब्ध छन् । जुम्लाको भाङको तेल, भाङको साबुन, मह देखि चिनो, मार्सी चामल, फापर पिठो, गाँजाको चियापत्ती जस्ता कर्णालीका उत्पादनहरू महोत्सवमा राखिएका छन् ।

अल्लो कपडा र गाँजाको कोट र झोला र कर्णालीका खाद्यान्नमा अवलोकनकर्ताको अभिरुचि बढी देखिएको स्टल होल्डरहरूले बताउनु भयो । 

महोत्सवमा अल्लो र गाँजाका पर्स,  कोट, झोला, गलबन्दी आदी राखिएका छन् । हुम्ला संखेलीका हरिलाल बुढा पहिलो पटक हुम्लाको उत्पादन लिएर महोत्सवमा आउनु भएको छ । कर्णालीलाई चिनेका केही ग्राहकले सामान किने पनि हेरेर मात्र जाने धेरै भएको बुढाको गुनासो छ । 

सल्यानमा बनेको खुकुरी लिएर स्टलमा बसेकी टीका बिक महोत्सवको व्यापारबाट सन्तुष्ट नै देखिन्छिन् । सापो नापो ब्यापार राम्रो भएको उहाँको भनाई छ । सल्यानमा बनेको खुकुरी, तरबार, मासु काट्ने दाउ र फलामका चक्कुहरू उहाँको स्टलमा छन् । छालाको खुकुरी राख्ने दाप पनि उहाँको स्टलमा पाइन्छ । दर्शकको रुचि खुकुरी तर्फ नै बढी देखिएको बिकले बताउनु भयो ।

जडीबुटी व्यवसायी सङ्घले राखेको स्टलमा पनि अधिकांश जडीबुटीहरू कर्णाली कै रहेका छन् । ब्यापार भन्दा प्रदर्शनमा सीमित रहेको सङ्घको स्टलमा जङ्गलमा पाईने जडीबुटीहरू राखिएका छन् । कर्णालीले महोत्सवको रौनक बढाएको नेपालगन्ज उद्योग वाणिज्य संघका महासचिव भिम बहादुर राना भाटले बताउनु भयो । उहाँले महोत्सवबाट कर्णाली र दूर दराजका कृषि उत्पादनहरूको प्रवद्र्धन भएको जिकिर गर्नुभयो । शहरमा बसेका युवाहरूले पनि हिमाली भेगमा हुने उपजहरू देख्न पाएको उल्लेख गर्दै भाटले दर्शकहरू पनि कृषिका स्टलहरूमा बढी रोकिने गरेको जानकारी दिनु भयो ।

मेलाको मुल उद्देश्यलाई कर्णालीका स्टलहरूले प्रतिनिधित्व गरेको महोत्सवका प्रचार संयोजक डम्बर चन्दले बताउनुभयो । उहाँले महोत्सवको मुख्य उद्देश्यले स्वदेशी उत्पादनको प्रचार प्रसार गर्नु रहेको स्पष्ट पार्नु भयो ।