चितवनमा राइनो कप महिला भलिबल प्रतियोगिता हुँदै 

चितवन  । चितवनमा राइनो कप खुला महिला भलिबल प्रतियोगिता पुस १२ गतेदेखि हुने भएको छ । हिमालय भलिबल क्लब भरतपुर १३ को आयोजनामा प्रतियोगिता हुन लागेको हो ।

पुस १२ देखि १४ गतेसम्म तीन दिन चल्ने प्रतियोगिताका खेलहरू हिमालय दण्डपाणी मावि भरतपुर १३ को मैदानमा हुनेछ । प्रतियोगितामा आठ टोली सहभागी हुने कार्यक्रम संयोजक रामहरि ढकालले जानकारी दिनुभयो  । केही टिममा राष्ट्रिय खेलाडीहरू समेत रहनेछन् ।  

सहभागी हुने सबै टोलीको टुङ्गो केही दिनमा लाग्ने ढकालले बताउनु भयो  । प्रतियोगिताको विजेताले ट्रफीसहित ५५ हजार ५५५ तथा उपविजेताले ३३ हजार ३३३ रुपैयाँ प्राप्त गर्नेछन् । सेमिफाइनलसम्म स्थान बनाउने थप दुई टोलीले १०–१० हजार रुपैयाँ प्राप्त गर्नेछन् ।

विधागततर्फ उत्कृष्ट सेटर, स्पाईकर, सर्भर, लिबरो, र प्रशिक्षकले २–२ हजार रुपैयाँ प्राप्त गर्नेछन् । प्रतियोगिताको तयारी तीव्र गतिमा भइरहेको कार्यक्रम संयोजक ढकालले जानकारी दिनुभयो ।