उदयपुरमा समयमै मतदान सुरु

उदयपुर । उदयपुरको दुई पालिकामा वडा अध्यक्षको पदमा हुने उपनिर्वाचनका लागि बिहान ७ बजे देखि मतदान सुरु भएको छ ।
जिल्लाको बेलका नगरपालिकाको वडा नम्बर ९ र जिल्लाको सदरमुकाम समेत रहेको त्रियुगा नगरपालिका १२ मा अध्यक्ष पदका लागि उपनिर्वाचनका लागि बिहान ७ बजेदेखि सुरु भएको मतदान साँझ ५ बजेसम्म चल्ने मुख्य निर्वाचन अधिकृतको कार्यालयले जनाएको छ।
२०७९ को स्थानीय तह निर्वाचनमा बेलका नगरपालिका वडा नम्बर ९ मा नेपाली काँग्रेसबाट पदम खड्का र त्रियुगा नगरपालिका वडा नम्बर १२ मा नेपाली काँग्रेसबाट चुडाराज काफ्ले निर्वाचित हुनुभएको थियो । उहाँहरूको छुट्टाछुट्टै स्थानमा सवारी दुर्घटनामा मृत्यु भएपछि रिक्त रहेको स्थानमा उपनिर्वाचन भएको हो ।
उपनिर्वाचन हुने स्थानमा निर्वाचनका लागि सुरक्षा व्यवस्था कडा पारिएको जिल्ला प्रशासन कार्यालयले जनाएको छ ।
बिहान समयमै मतदान सुरु भएको भए पनि मतदाताको भने उत्साह जनक उपस्थिति देखिएको छैन ।