टिपरले ठक्कर दिँदा एकको मृत्यु एक घाइते

वीरगन्ज  । वीरगञ्ज पोखरिया सडकखण्ड अन्तर्गत अलौंस्थित छगछियामा आज भएको सवारी दुर्घटनामा परी एकजनाको मृत्यु भएको छ भने एकजना घाइते भएका छन् ।

ना ८ ख २६११ नम्बरका टिपरले बिआर २२ बी.जी. १४५२ नम्बरको भारतीय मोटरसाइकललाई ठक्कर दिँदा मोटरसाइकलमा सवार पर्सा, जिराभवानी गाउँपालिका वडा नम्बर–५ सखुवनीया निवासी २५ वर्षीय प्रभु राउत थारुको घटनास्थलमै मृत्यु भएको जिल्ला प्रहरी कार्यालय पर्साका सूचना अधिकारी एवम् डिएसपी किशोर लम्सालले जानकारी दिनुभयो । 

दुर्घटनामा परी जिराभवानी गाउँपालिकाकै वडा नम्बर २ निवासी २० वर्षीय राकेश महतो घाइते भएका छन् । घाइतेको नारायणी अस्पताल वीरगन्जमा उपचार भइरहेको छ । मृतक थारुको शव पोष्टमार्टमको लागि नारायणी अस्पतालमा पठाएको पर्सा प्रहरीले जनाएको छ । 

ठक्कर दिने टिपर र त्यसका चालकलाई प्रहरीले नियन्त्रणमा लिई आवश्यक अनुसन्धान अगाडि बढाएको छ ।