टाटा सुमो दुर्घटना हुँदा एक बालकको मृत्यु, ८ जना घाइते

बारा । बाराको नितनपुरमा टाटा सुमो दुर्घटना हुँदा एक बालकको मृत्यु भएको छ भने ८ जना घाइते भएका छन् ।

काठमाडौँबाट वीरगन्जतर्फ जाँदै गरेको ना१ज ४४२८ नम्बरको टाटा सुमो जीतपुरसिमरा उपमहानगरपालिका–१० नितनपुरमा अनियन्त्रित भई दुर्घटना भएको ईलाका प्रहरी कार्यालय सिमराले जनाएको छ ।

सुमोमा रहेका भारत बिहार मोतिहारी थाना सुगौली रक्सौलका नवीन कुमार साहका चार वर्षीय छोरा अनमोल कुमार साहको मृत्यु भएको ईलाका प्रहरी कार्यालय सिमराका प्रहरी नायब उपरीक्षक चिरञ्जीवी दाहालले जानकारी दिनुभयो ।

बालकको वीरगन्जस्थित बयोधा मेडिसिटी अस्पतालमा उपचारको क्रममा मृत्यु भएको हो । दुर्घटनामा घाइते भएका आठ जनाको बयोधा मेडिसिटी अस्पतालमा उपचार भइरहेको प्रहरीले जनाएको छ ।