त्रिवेणीधाममा पर्यटकबाट उठेको रकमले विद्यालय सञ्चालन

नवलपरासी  । प्रसिद्ध पर्यटकीय स्थल त्रिवेणीधाममा रहेको गुरुकुलमा विद्यार्थीहरूले निःशुल्क पठनपाठन गर्दै आइरहेका छन्। 

त्रिवेणीधामभित्र मुक्तिनाथ वेद विद्याश्रम स्कुल सञ्चालन भई संस्कृत भाषा पठनपाठन हुँदै आएको छ । दैनिकजसो भारतबाट आउने धार्मिक पर्यटकले अवलोकन गर्ने शिशमहलको आम्दानीबाट नै उक्त विद्यालयमा ७० जना विद्यार्थीहरूलाई अध्ययन अध्यापन गराइएको छ । 

त्रिवेणीस्थित गजेन्द्र मोक्ष धाममा शिशमहल र मुक्तिनाथ वेद विद्याश्रम रहेको छ । उनीहरूको आवास र अध्ययन निःशुल्क रहेको छ । संस्कृत समेत पढाइ हुने भएकाले देशका  विभिन्न जिल्लाका विद्यार्थी यस वेद विद्याश्रममा अध्ययनरत छन्। यहाँ भएको शिशमहल हेर्न नेपाली र भारतीयले २४ रुपैयाँको टिकट काट्नुपर्ने व्यवस्था छ ।

यहाँ सार्वजनिक बिदा र चाडपर्वमा दर्शनार्थीहरूको घुइँचो लाग्ने गरेको मुक्तिनाथ वेद विद्याश्रमका सञ्चालक स्वामी कृष्ण प्रपन्नाचार्यले बताउनुभयो।

माघे औँसी, चैते दसैँ, माघे सङ्क्रान्ति, माघे औँसीमा एकै दिन दशौँ हजारले शिशमहल अवलोकन गर्ने गर्छन् । गत माघे औँसीमा एकै दिन १० हजारभन्दा बढी दर्शनार्थीले शिशमहल अवलोकन गरेको उहाँले जानकारी दिनुभयो।

भारतको महाराजगन्जबाट आइतबार शिशमहल अवलोकनका लागि आउनुभएका वीरनाथ करलाले त्रिवेणीधामप्रति भारतीयहरूको उत्तिकै श्रद्धा र विश्वास रहेकाले आफू परिवारसहित यहाँ आएको बताउनुभयो । शिशमहलको बारेमा भारतमा समेत चर्चा रहेकाले आफूहरू लोभिएको र वर्षौंदेखिको यहाँ आउने धोको पूरा भएको आम अवलोकन कर्ताहरूको भनाई छ। शान्त वातावरण,नारायणी नदिको किनारमा रहेको यस धाममा जो कोही पनि आनन्दित भएर जाने गरेका छन्।