बझाङमा जीप दुर्घटना : मृतक चार जनाको पहिचान खुल्यो (अपडेट)
बझाङ । बझाङको मष्टा गाउँपालिकामा भएको जीप दुर्घटनामा मृत्यु भएका मध्ये चार जनाको पहिचान खुलेको छ ।
पहिचान खुलेका चार जनामा दुई महिला र दुई पुरुष रहेका छन् ।
दुर्घटनामा मष्टा गाउँपालिका–२ खेतकोटकी १३ वर्षीया सम्झना खड्का, सोही ठाउँका २५ बर्षीय रोशन खड्का, ११ बर्षीय प्रचण्ड खड्का र २८ बर्षीया बसन्ती धामीको घटनास्थलमै ज्यान गएको जिल्ला प्रहरी कार्यालय बझाङका सूचना अधिकारी रमेशदत्त अवस्थीले जानकारी दिनुभयो ।
उहाँका अनुसार अन्य मृतक र घाइतेहरूको पहिचान खुलेको छैन ।
बझाङको सदरमुकाम चैनपुर नजिक रहेको डुङ्ग्री बजारबाट मष्टा गाउँपालिका–२ खेतकोट जाँदै गरेको जीप आज दिउँसो दुर्घटना हुँदा ६ जनाको घटनास्थलमै ज्यान गएको थियो ।
सु.प.प्र ०१–००१ च ११७ नम्बरको जीप तुफान डाँडामा दुर्घटनामा परेको थियो । जीप सडकबाट दुई सय मिटर तल भिरमा खसेको थियो ।
अहिले घाइतेहरूलाई जिल्ला अस्पताल सिमखेत ल्याउने काम भइरहेको समेत सूचना अधिकारी अवस्थीले बताउनुभयो ।
सम्बन्धित समाचार
प्रतिक्रिया राख्नुहोस्