पाँचथरमा मोटरसाइकल दुर्घटना हुँदा एक युवकको मृत्यु

पाँचथर । पाँचथर जिल्लाको हिलिहाँङ गाउँपालिका–७  अन्तर्गत मध्य पहाडी लोकमार्गमा मोटरसाइकल दुर्घटना हुँदा एक युवकको मृत्यु भएको छ ।  

मृत्यु हुनेमा मोटरसाइकल चालक हिलिहाङ–४ का ३६ वर्षीय रमेश योङया रहेको प्रहरीले जनाएको छ । 

योङयालाई शुक्रवार बिहान साढे ८ बजे लोकमार्ग अन्तर्गत एक्चेप्पा भिरमा अड्किएको अवस्थामा प्रहरीले  फेला पारेको थियो ।  प्रहरीले उपचारको लागि जिल्ला अस्पताल पाँचथर पुर्‍याउनासाथ डाक्टरले योङयालाई मृत घोषणा गरेको जिल्ला प्रहरी कार्यालय पाँचथरले जनाएको छ ।

योङया बिहीबार बेलुका ५ बजे पल्सर मोटरसाइकलमा घरबाट सदरमुकाम फिदिम हिँडेका बताइएको छ । 

घटना सम्बन्धमा जिल्ला प्रहरी कार्यालय पाँचथरबाट थप अनुसन्धान भइरहेको प्रहरीले बताएको छ ।