भोटेकोसी बाढी: माथिल्लो त्रिशूली-१ को टनेलभित्र ६ जनाको शव फेला, खोजी जारी

रसुवा । भाद्र १० गते भोटेकोसीमा आएको विनाशकारी बाढीका कारण माथिल्लो त्रिशूली-१ जलविद्युत् आयोजनाबाट सम्पर्कविहीन भएका व्यक्तिहरूको खोजीका क्रममा संयुक्त उद्धार टोलीले ६ वटा शव बाहिर निकालेको छ।

नेपाली सेना तथा आयोजनाका प्रतिनिधिहरूसहितको संयुक्त उद्धार टोलीले अडिट ३ टनेलभित्र ढलानका लागि बुनिएको डन्डीको जालीमा अल्झिएका अवस्थामा ती शवहरू फेला पारेको हो।

अत्यन्त कठिन परिस्थितिमाझ उद्धार टोलीले ग्राइन्डर (Grinder), ग्यास कटर र रोटरी रेस्क्यु उपकरणहरूको प्रयोग गरी जाली काटेर ती ६ वटा शवहरू बाहिर निकालेको नेपाली सेनाले जनाएको छ।  

टनेलभित्र व्यापक हिलो भरिएको र हिलोमा अन्य शव जस्तै देखिने आकृतिहरू समेत भेटिएकाले सो इलाकामा उद्धार कार्यलाई अझ तीव्र बनाइएको छ। बाढीका कारण बेपत्ता भएका अन्य व्यक्तिहरूको खोजी कार्य निरन्तर जारी रहेको छ।