सिक्टा सिँचाइको डुडुवा शाखा नहर निर्माणले लियो गति
बाँके। राष्ट्रिय गौरवको सिक्टा सिँचाइ आयोजनाअन्तर्गत डुडुवा शाखा नहर निर्माण कार्य लामो अवरोधपछि तीव्र गतिमा अघि बढेको छ। विभिन्न प्राविधिक र कानुनी समस्याले रोकिएको आयोजना पुनः सुरु भएपछि स्थानीय किसानमा आशा बढेको छ।
नहर निर्माणमा बाधा बनेका विद्युत पोल, भूमिगत केबल र खानेपानीका पाइप व्यवस्थापन गर्दै काम अघि बढाइएको आयोजनाले जनाएको छ।
आयोजनाका इञ्जिनियर विकास विष्टका अनुसार २३.४ किलोमिटर लामो नहरबाट करिब १६ हजार हेक्टर जमिनमा सिँचाइ सुविधा पुग्नेछ। नहरअन्तर्गत खजुरा र मानपुर दुई मुख्य शाखा रहनेछन्।
उहाँका अनुसार विगतमा ठेक्का विवादका कारण काम रोकिएको थियो। पुरानो ठेक्का रद्द गरेर नयाँ कम्पनीमार्फत निर्माण सुरु गरिएको हो।
नेपालगञ्ज–सुर्खेत सडक खण्डअन्तर्गत पिप्रहवादेखि राझासम्म करिब ५ किलोमिटर क्षेत्रमा टनेलमार्फत नहर निर्माण गरिनेछ भने बाँकी भाग खुला संरचनामा बन्नेछ।
रामेछाप शेर्पा कन्स्ट्रक्सन प्रालिले करिब १ अर्ब १२ करोड रुपैयाँ लागतमा तीन वर्षभित्र सम्पन्न गर्ने जिम्मा पाएको छ। कम्पनीका अनुसार हालसम्म २६ प्रतिशत भौतिक प्रगति भएको छ र असार मसान्तसम्म ४० प्रतिशत पुर्याउने लक्ष्य राखिएको छ।
आयोजना प्रमुख राजु आचार्यले विभिन्न निकायसँगको सहमतिमा अवरोध हटाउँदै निर्माणलाई निरन्तरता दिइएको बताउनुभयो।
नहर सम्पन्न भएपछि डुडुवा, खजुरा, नेपालगञ्ज र जानकी क्षेत्रका किसानले वर्षैभरि सिँचाइ सुविधा पाउने अपेक्षा गरिएको छ। यसले कृषि उत्पादन बढाउन मद्दत पुग्ने विश्वास गरिएको छ।
प्रतिक्रिया राख्नुहोस्