रूसले दावी गरेको भूमि दिन युक्रेन तयार नभएमा युद्ध जारी राखिने पुटिनको भनाइ

बिश्केक, किर्गिस्तान । किएभले मस्कोले दाबी गरेको क्षेत्रबाट फिर्ता भएमा रूसले युक्रेनमा आक्रमण अन्त्य गर्ने अन्यथा रूसी सेनाले उक्त क्षेत्र बलपूर्वक कब्जा गर्ने रूसी राष्ट्रपति भ्लादिमिर पुटिनले बिहीबार बताउनुभएको छ।

रूसी सेना बिस्तारै तर स्थिर रूपमा पूर्वी युक्रेनमा युक्रेनी सेना बिरूद्धको महँगो लडाईमा फसिरहेको छ ।

रूसले युद्ध जारी राख्ने बताइरहँदा उता वाशिङ्गटनले भने लगभग चार वर्षको युद्ध अन्त्य गर्न गरेको आफ्नो प्रयासलाई नवीकरण गरेको छ र आश्चर्यजनक योजना अघि सारेको छ । प्रस्तावलाई मस्को र किएभसँगको आगामी वार्ताको माध्यमबाट अन्तिम रूप दिने बताएको छ।

“यदि युक्रेनी सेनाले आफ्नो कब्जामा रहेको क्षेत्र छोडे भने हामी युद्ध अभियान रोक्नेछौँ,’ पुटिनले किर्गिस्तानको भ्रमणका क्रममा भन्नुभयो । “यदि उनीहरूले त्यसो गरेनन् भने, हामी यसलाई सैन्य माध्यमबाट प्राप्त गर्नेछौँ ।

युक्रेनको पाँच भागको एक भाग रुसले नियन्त्रण गरेको छ । कब्जा गरिएको भूमिको मुद्दा किएभले कहिल्यै छोड्ने छैन भनेको छ, यो शान्ति प्रक्रियाको सबैभन्दा ठूलो अवरोधहरू मध्ये एक हो।

वार्ताको अर्को महत्त्वपूर्ण मुद्दा भनेको युक्रेनको लागि पश्चिमी सुरक्षा सुनिश्चितता हो । भविष्यमा रूसले फेरि आक्रमण गर्नबाट रोक्नको लागि यो आवश्यक रहेको किएभले बताएको छ ।

युक्रेनका युरोपेली सहयोगीहरूको सहभागिता बिना संयुक्त राज्य अमेरिकाले तयार गरिएको वाशिङ्गटनको मूल योजनाले किएभलाई पूर्वी डोनेट्स्क क्षेत्रबाट फिर्ता गर्ने र डोनेट्स्क, क्रिमिया र लुगान्स्क क्षेत्रहरूलाई रूसी भूगोलका रूपमा मान्यता दिने उल्लेख गरिएको छ ।

अमेरिकाले किएभ र युरोपको आलोचनापछि गत हप्ताको अन्त्यमा मूल योजनालाई फिर्ता गर्दै अझै नयाँ संस्करण जारी गर्ने बताएको छ तर यो अझै जारी भएको छैन ।

संशोधित नयाँ योजनाको अध्ययन गरेका पुटिनले यो वार्ताको सुरुवात हुन सक्ने बताउनुभएको छ।

उहाँले पछिल्लो मस्यौदाको बारेमा भन्नुभयो, “समग्रमा, हामी सहमत छौँ । यो भविष्यका सम्झौताहरूको आधार बन्न सक्छ।” प्रस्तावलाई अमेरिकाले लगभग २० बुँदामा छोट्याएको अनुमान गरिएको छ।

अमेरिकी वार्ताकार स्टिभ विटकोफ अर्को हप्ता मस्को भ्रमण गर्ने अपेक्षा गरिएको रूसी नेता पुटिनले बताउनुभएको छ।

अमेरिकी रक्षामन्त्री डान ड्रिस्कोलले यसै साताको अन्त्यमा किएभको भ्रमण गर्ने युक्रेनका शीर्ष राष्ट्रपतिका सहयोगी एन्ड्री येरमाकले बताउनुभएको छ।

बिहीबार आफ्नो टिप्पणीमा पुटिनले रुसले युक्रेनको पूर्वी डोनेत्स्क क्षेत्रको पोक्रोभ्स्क र मर्नोग्राडमा युक्रेनी सेनालाई घेरेको दाबी दोहो¥याउनुभयो ।

“क्रास्नोर्मेय्स्क र दिमित्रोभ पूर्ण रूपमा घेरिएका छन्,” उहाँले शहरहरूको लागि रूसी नामहरू प्रयोग गर्दै भन्नुभयो।

“मस्को भोभचान्स्क र सिभस्र्कमा पनि अगाडि बढिरहेको छ, साथै गुलियापोलको प्रमुख बन्दोबस्तीका क्षेत्रको नजिक पुगेको छ,” उहाँले भन्नुभयो ।

युक्रेनले पोक्रोभ्स्क र मर्नोग्राडलाई घेरिएको अस्वीकार गरेको छ र आफ्नो सेनाले शत्रुसँग लडिरहेको बताएको छ।

पुटिनले युक्रेनी राष्ट्रपति भोलोदिमिर जेलेन्स्कीको वैधतामाथि पनि प्रश्न उठाउनुभएको छ र उहाँसँग कुनै पनि सम्झौतामा हस्ताक्षर गर्नु कानुनी रूपमा ‘लगभग असम्भव’ हुने बताउनुभएको छ।