राष्ट्रिय खेलाडी पूजा राना सम्मानित

बाँके । भर्खरै सम्पन्न साफ महिला च्याम्पियनसिपमा नेपाललाई फाइनलसम्म पुर्‍याउन महत्त्वपूर्ण भूमिका निर्वाह गरेकी नेपाली महिला फुटबल टोलीकी राष्ट्रिय खेलाडी पूजा रानालाई कोहलपुर नगरपालिकाले सम्मान गरेको छ ।

कोहलपुर नगरपालिकाले रानालाई नगद ५१ हजार रुपैयाँ र प्रमाणपत्र प्रदान गर्दै रानाको उपलब्धि र योगदानको कदर गरेको हो। बङ्गलादेश सँगको प्रतिस्पर्धामा पराजित हुँदै नेपाली टोली उपविजेता बनेको थियो ।

सम्मान कार्यक्रममा नगर प्रमुख पूर्णप्रसाद आचार्यले खेलाडीलाई राष्ट्रको पहिचान र गहनाका रूपमा सम्मान गर्दै कोहलपुर नगरपालिका खेलाडी उत्पादन र प्रवर्धनमा निरन्तर सक्रिय रहेको बताउनुभयो । उहाँले नगरपालिका स्तरमा स्कुल, वडा र गोल्ड कप जस्ता प्रतियोगिताहरू नियमित आयोजना गर्दै खेलाडीको विकास र आत्मबल बढाउन प्रयत्नशील रहेको उल्लेख गर्नुभयो।

कार्यक्रममा उपप्रमुख सङ्गीता सुवेदीले पूजा रानालाई सम्मान गर्न पाउँदा कोहलपुर नगरपालिका गर्वित भएको बताउनुभयो। उहाँले स्थानीय स्तरमा राष्ट्रिय स्तरका खेलाडी उत्पादन गर्न स्थानीय सरकार प्रतिबद्ध रहेको र खेलकुदको क्षेत्रलाई प्राथमिकतामा राखेको बताउनुभयो। खेलाडी रानाले सम्मानबाट थप प्रोत्साहन मिलेको बताउनुभयो ।