एमाले सचिवालय बैठक : तत्काल नयाँ विधेयक ल्याउन सरकारसँग माग

काठमाडौँ । प्रमुख प्रतिपक्षी दल नेकपा एमालेको आज बसेको सचिवालयले अनुचित लेनदेन अथवा मिटर व्याज पीडितलाई राहत दिन तत्काल नयाँ विधेयक ल्याउन सरकारसँग माग गरेको छ ।

यस्तै बैठकले कोशी प्रदेशमा सभामुख समेत सरकार गठनमा संलग्न भएका कारण प्रदेश सरकार विघटन गरी कानुनसम्मत सरकार गठन गर्न माग गरेको नेकपा एमालेका उपमहासचिव प्रदीप ज्ञवालीले बैठकपछि सञ्चारकर्मीहरूलाई जानकारी दिनुभयो ।

बैठकले गाई–गोरुमा महामारीका रुपमा फैलिएको लम्पी स्किन रोगको निवारणका लागि खोप अभियान सञ्चालन गर्न तथा पीडित किसानलाई राहत दिन तथा समयमै रासायनिक मल उपलब्ध गराउन माग गरेको उपमहासचिव ज्ञवालीले बताउनुभयो ।

निरन्तरको वर्षा र बाढी पहिरोका कारण विभिन्न ठाउँमा अवरूद्ध भएका राजमार्ग खुलाउन तथा समयमै पीडितको उद्धार र राहतका लागि सरकारसँग माग गर्दै बैठकले पार्टीका कार्यकर्ताहरूलाई समेत उद्धार तथा राहतका काममा खटिन निर्देशन दिएको उपमहासचिव ज्ञवालीले बताउनुभयो ।