टाँगिया बस्तीबाट ६४ क्यु फिट सालको काठ बरामद

बारा । तामागढी सब डिभिजन बन कार्यालय, बाराले जीतपुरसिमरा उपमहानगरपालिकाको टाँगिया बस्तीबाट ६४ क्यु फिट सालको काठ बरामद गरेको छ । 

झाडीमा लुकाएर राखिएको अवस्थामा १० वटा  काठको गोलिया बरामद भएको तामागढी सब डिभिजन बन कार्यालयका सहायक बन अधिकृत हरि शंकर साहले जानकारी दिनुभयो । 

उहाँले फुटबल ग्राउन्ड निर्माण गर्ने क्रममा तस्करहरूले काठको गोलिया लुकाएर राखेको हुन सक्ने आशङ्का व्यक्त गर्नुभयो । 

बरामद काठको गोलियालाई तामागढी सब डिभिजन बनको कार्यालयमा राखिएको डिभिजन बन कार्यालय बाराले जनाएको छ । 

बरामद काठको विषयमा स्थानीयसँग सोधपुछ कार्य भइरहेको सहायक बन अधिकृत साहले बताउनुभयो ।