राप्रपा रचनात्मक प्रतिपक्षको भूमिकामा छः अध्यक्ष लिङ्देन

नेपालगञ्ज। राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आफ्नो पार्टीले रचनात्मक र जिम्मेवार प्रतिपक्षको भूमिका निर्वाह गरिरहेको बताउनुभएको छ ।

शुक्रबार नेपालगञ्जमा आयोजित पत्रकार भेटघाट कार्यक्रममा बोल्नुहुँदै अध्यक्ष लिङ्देनले लोकप्रियताको आधारमा बनेको वर्तमान सरकारले जनतामा आशा जगाउने काम गर्नुपर्ने भए पनि सरकारका प्रारम्भिक गतिविधि आशाजनक नदेखिएको टिप्पणी गर्नुभयो ।

उहाँले प्रधानमन्त्री बालेन्द्र शाहसँग भएको भेटमा स्वास्थ्य बीमा, रासायनिक मलको उपलब्धता, सुकुम्बासी समस्या, संविधान संशोधन लगायत विषयमा सरकारको धारणा माग्दै राप्रपाका तर्फबाट सुझाव समेत प्रस्तुत गरिएको जानकारी दिनुभयो । प्रधानमन्त्री शाहले ती विषयमा सरकार गम्भीरतापूर्वक लागिरहेको बताएको लिङ्देनको भनाइ थियो ।

पत्रकार सम्मेलनमा पार्टीका महामन्त्री डा. धवल शमशेर राणाले पार्टी छोडेर सुरु गरेको राजसंस्था पुनःस्थापनाको अभियानबारे सोधिएको प्रश्नमा अध्यक्ष लिङ्देनले राप्रपाको धारणा स्पष्ट पार्नुभयो । उहाँले आन्दोलन वा विद्रोहको बाटो भन्दा राष्ट्रिय सहमतिमार्फत राजसंस्था पुनःस्थापना हुनुपर्ने पार्टीको अडान रहेको बताउनुभयो ।

“उहाँहरू आन्दोलन र विद्रोहबाट राजसंस्था ल्याउन चाहनुहुन्छ, तर हामी राष्ट्रिय सहमतिका आधारमा राजसंस्था पुनःस्थापना हुनुपर्छ भन्ने पक्षमा छौँ,” अध्यक्ष लिङ्देनले भन्नुभयो, “राजा देशको अभिभावकीय भूमिकामा रहनुपर्छ भन्ने नै हाम्रो स्पष्ट धारणा हो।”