रास्वपा बागमती प्रदेशको निर्वाचनको नयाँ मिति घोषणा

मकवानपुर । राष्ट्रिय स्वतन्त्र पार्टी (रास्वपा) ले यसअघि स्थगित गरिएको बागमती प्रदेश समितिको निर्वाचनको नयाँ मिति घोषणा गरेको छ।

केन्द्रीय निर्वाचन आयोगले बिहीबार जारी गरेको जरुरी सूचनाअनुसार निर्वाचन जेठ ३० गते काठमाडौँको धुम्बाराहीस्थित स्मार्ट दरबार, शंखपार्कमा सम्पन्न हुनेछ। हेटौँडामा अधिवेशनका क्रममा उत्पन्न विवादका कारण निर्वाचन प्रक्रिया रोकिएको थियो, त्यसपछि निर्वाचन काठमाडौँमा सार्ने निर्णय गरिएको हो।

आयोगका प्रमुख भुवन केसीका अनुसार मतदान बिहान ११ बजेदेखि अपराह्न ५ बजेसम्म हुनेछ। मतदान प्रक्रिया पूर्ण रूपमा विद्युतीय मतदान मेसिनमार्फत सञ्चालन गरिनेछ।

रास्वपाको बागमती प्रदेश अधिवेशन मङ्गलवारदेखि हेटौँडामा सुरु भएको थियो। अधिवेशनका क्रममा विवाद उत्पन्न भएपछि निर्वाचन प्रक्रिया स्थगित गरिएको थियो। आयोगले निर्वाचनसँग सम्बन्धित सम्पूर्ण प्राविधिक तयारी पूरा भइसकेकाले अब निर्वाचन प्रक्रिया पुनः अघि बढाइएको जनाएको छ।