प्रधानमन्त्री कप क्रिकेटमा आर्मीको अपराजित यात्रा जारी

जनकपुरधाम । प्रधानमन्त्री कप एक दिवसीय क्रिकेट प्रतियोगितामा त्रिभुवन आर्मीले आफ्नो अपराजित यात्रालाई निरन्तरता दिँदै कोशी प्रदेशलाई १८५ रनले पराजित गरेको छ ।

जनकपुरधामको निर्माणाधीन रामजानकी बहुउद्देश्यीय अन्तर्राष्ट्रिय रङ्गशालामा भएको खेलमा त्रिभुवन आर्मी क्लबले ५० ओभर खेल्दै ८ विकेटको क्षतिमा ३६२ रनको उच्च स्कोर खडा गरेको थियो । ३६३ रनको लक्ष्यसहित व्याटिङ्ग गरेको कोशी प्रदेशले ३६ ओभरमा अल आउट हुँदै १७७ रन मात्र बनाउन सक्यो ।

त्रिभुवन आर्मीका तर्फबाट ओपनर व्याट्स म्यान विनोद भण्डारीले १८९ रन बनाएका थिए । आर्मीका तीर्थराज दासले ३३, भिम सार्कीले ८० र जीतेन्द्र ठकुरीले ३१ जन जोडेका थिए ।

कोशीका तर्फबाट विपिन महतोले ३, दिपेश खण्डेवालले १, सोहन साहले १ र आशिष मगरले १ विकेट लिएका थिए ।

कोशीका तर्फबाट ओपनर सुजन थपलियाले ५ चौका १ छक्काको मद्दतले ३० रन जोडेका थिए । सुभाष भजगनले ३०, आशिष मगरले २५, दिपेश खण्डेवालले १३ रन बनाए पनि अन्य व्याट्स म्यानले दोहोरो अङ्कमा रन जोडन नसकेपछि कोशी ३६ ओभरमा अल आउट हुँदै १७७ रनमा समेटियो । 

बलिङमा आर्मीका साहब आलमले १, आकाश चन्दले ३, बसीर अहमदले २, पवन सार्कीले १ र नरेश साउदले १ विकेट लिएका थिए । 

आजको खेलमा त्रिभुवन आर्मीका विनोद भण्डारी प्लेयर अफ दि म्याच घोषित  भएका थिए । 

जितसँगै त्रिभुवन आर्मी क्लब जारी प्रधानमन्त्री कप एक दिवसीय क्रिकेट प्रतियोगितामा शीर्ष स्थानमै रहँदै फाइनल प्रवेश गरेको छ ।