वसन्तसँगै ढकेरी उद्यान बने पर्यटकको रोजाइ

बाँके। राप्तीसोनारी गाउँपालिका–९ स्थित ढकेरी वनस्पति उद्यान यतिबेला आन्तरिक पर्यटकको प्रमुख आकर्षण बनेको छ। वसन्त ऋतुको आगमनसँगै उद्यान रंगीन फूलहरूको बहारले सजिएको छ, जसले यहाँ पुग्ने जो–कोहीको मन सहजै लोभ्याउने गरेको छ।

पूर्व–पश्चिम राजमार्गको छेउमै अवस्थित यस उद्यानमा प्रवेश गर्नेबित्तिकै गुलाब, सयपत्री, मखमलीलगायत विभिन्न रङका फूलहरूले आगन्तुकलाई स्वागत गर्छन्। स्वच्छ, सफा र हरियालीले भरिएको वातावरणसँगै चारैतिर फैलिएको मनमोहक दृश्यले घुम्न आउनेहरूलाई छुट्टै आनन्दको अनुभूति गराइरहेको छ।

बिहानदेखि साँझसम्म पार्कमा रमाउन आउनेहरूको भीड लाग्ने गरेको छ। कोही परिवारसँग घुम्न आएका छन् भने कोही साथीभाइसँग रमाइरहेका छन्। धेरै युवा–युवती भने मोबाइलमा फोटो र भिडियो कैद गर्न व्यस्त देखिन्छन्। उद्यानका हरेक कुनामा मुस्कान, उत्साह र रमाइलोपन झल्किएको देखिन्छ।

हाल दैनिक करिब एक हजार आन्तरिक तथा बाह्य पर्यटक उद्यान अवलोकन र मनोरञ्जनका लागि पुग्ने गरेका छन्।
‘यहाँ आउँदा मन निकै आनन्दित हुन्छ, फूलहरूले वातावरण नै बदलिदिएको छ,’ पार्क घुम्न आएकी शान्ति सुनारले मुस्कुराउँदै भनिन्।

उद्यानको हरियाली र रंगीन फूलहरूले मानिसहरूलाई केही समयका लागि भए पनि दैनिक व्यस्त जीवनबाट टाढा लैजाने काम गरेको देखिन्छ। बालबालिका खेल्दै रमाइरहेका छन् भने ज्येष्ठ नागरिकहरू शान्त वातावरणमा बसेर दृश्यावलोकन गरिरहेका भेटिन्छन्।

सामाजिक सञ्जालबाट जानकारी पाएपछि साथीहरूसँग घुम्न आएकी प्रज्ञा सोनीले उद्यान निकै आकर्षक रहेको बताइन्। सल्यान घर भई हाल कोहलपुरमा बस्दै आएकी मुना सुनारले पनि समय बिताउन र रमाइलो गर्न ट्याक्सी चढेर उद्यानसम्म पुगेको सुनाइन्।
‘सधैँ घरमै बस्दा समय कटाउन गाह्रो हुन्छ, यहाँ आएर मन निकै हलुका भयो। सबैले एक पटक घुम्न आउनुपर्छ,’ उनले भनिन्।

पत्रकार प्रमिला विश्वकर्माले उद्यानको सौन्दर्य र पर्यटकीय सम्भावनाबारे भनिन्, “ढकेरी वनस्पति उद्यान प्राकृतिक सौन्दर्य र हरियालीले भरिएको अत्यन्त आकर्षक स्थल रहेछ। यहाँका रंगीन फूल, शान्त वातावरण र स्वच्छता हेर्दा जो–कोहीको मन लोभिन्छ। यस्तो रमणीय स्थानले आन्तरिक पर्यटन प्रवर्द्धनमा महत्वपूर्ण भूमिका खेल्न सक्छ। स्थानीय सरकार र सम्बन्धित निकायले थप प्रचारप्रसार र व्यवस्थापनमा ध्यान दिए यसले बाँकेकै प्रमुख पर्यटकीय गन्तव्यका रूपमा पहिचान बनाउन सक्छ।”

उद्यानमा बढ्दो भीडले स्थानीय यातायात व्यवसायीलाई पनि राहत दिएको छ। कोहलपुरदेखि ढकेरीसम्म यात्रु ओसारपसार गर्दा आम्दानी राम्रो भइरहेको ई–रिक्सा चालक रन्नबहादुर बस्नेत बताउँछन्।

२०५६ सालमा स्थापना भएको ढकेरी वनस्पति उद्यान पछिल्ला केही वर्षयता झन् लोकप्रिय बन्दै गएको उद्यान प्रमुख दिनेश बरालले जानकारी दिए। उनका अनुसार उद्यानमा जडिबुटी तथा वनस्पतिको अध्ययन–अनुसन्धानका साथै मनोरञ्जनका लागि आउनेहरूको संख्या पनि उल्लेख्य रूपमा बढेको छ।

समुद्री सतहबाट करिब १६० मिटर उचाइमा रहेको यो उद्यान करिब ५ हेक्टर क्षेत्रफलमा फैलिएको छ। यहाँ लोपोन्मुख जडिबुटी संरक्षण, वनस्पति अध्ययन–अनुसन्धान, शैक्षिक प्रचारप्रसार तथा मनोरञ्जन स्थलका रूपमा विकास गर्ने कार्य भइरहेको छ।

विशेषगरी फागुनदेखि फूल फुल्ने मौसम सुरु भएसँगै यहाँको चहलपहल अझ बढ्ने गरेको छ।

बढ्दो भीडलाई व्यवस्थित गर्न प्रवेश शुल्क निर्धारण गरिएको छ—१० वर्षमुनिका लागि १० रुपैयाँ, १० वर्षमाथिका लागि २० रुपैयाँ र ज्येष्ठ नागरिकका लागि ५ रुपैयाँ।

यद्यपि, बढ्दो आकर्षणसँगै पार्किङको अभाव र कतिपय स्थानमा देखिएको फोहोर व्यवस्थापन चुनौतीका रूपमा देखिएको छ। तर पनि, ढकेरी वनस्पति उद्यान अहिले राप्तीसोनारी मात्र नभई बाँके जिल्लाकै एक प्रमुख पर्यटकीय गन्तव्यका रूपमा स्थापित हुँदै गएको छ।

फूलहरूको बहारसँगै यहाँ आउनेहरूको अनुहारमा झल्किएको खुशीले यस स्थानको महत्व झन् बढाएको छ।