डडेल्धुरामा १० उम्मेदवारको जमानत जफत

फाल्गुन । डडेल्धुरामा प्रतिनिधिसभा सदस्य निर्वाचनअन्तर्गत डडेल्धुरामा पूर्व राष्ट्रियसभा सदस्य तथा नेकपा (एमाले) का उम्मेदवार चक्रप्रसाद स्नेहीसहित १० जनाको जमानत जफत भएको छ ।

प्रतिनिधिसभा सदस्य निर्वाचन ऐन, २०७४ को दफा ७१ (१) अनुसार पहिलो हुने निर्वाचित हुने प्रणालीअन्तर्गत कुल सदर मतको १० प्रतिशतभन्दा कम मत प्राप्त गर्ने उम्मेदवारको धरौटी जफत हुने व्यवस्था छ ।

डडेल्धुरामा कुल ४३ हजार ६७ मत सदर भएकाले जमानत जोगाउन उम्मेदवारले कम्तीमा ४ हजार ३ सय ७ मत ल्याउनुपर्ने थियो । तर एमालेका स्नेहीले भने २ हजार ९२६ मत मात्रै प्राप्त गरेपछि उहाँको जमानत जफत भएको हो ।

जमानत जफत हुने अन्य उम्मेदवारमा राष्ट्रिय प्रजातन्त्र पार्टी (राप्रपा)का गोविन्द खडायत, आम जनता पार्टीका खडकबहादुर ठकुराठी, राष्ट्रिय जनमोर्चाका चन्द्रदेव विक, नेपाल मजदुर किसान पार्टीका सुरेन्द्रराज भट्ट, जय मातृभूमि पार्टीका लक्ष्मीदत्त भट्ट र श्रम संस्कृति पार्टीका महेन्द्र पुनमगर  छन् ।

यस्तै स्वतन्त्र उम्मेदवार गोरखबहादुर ऐर, सुरेन्द्र रावल र तीर्थराज उप्रेतीको पनि जमानत जफत भएको छ ।  

यहाँ तीन जना उम्मेदवारले जमानत जोगाएका छन् । जसमा राष्ट्रिय स्वतन्त्र पार्टीका डा. ताराप्रसाद जोशी (विजयी), नेपाली कांग्रेसका नैनसिंह महर र नेकपाका मानसिंह मालले मात्र जमानत जोगाएका हुन् ।