इलाममा मतपेटिका सङ्कलन गरिँदै, भण्डारणको लागि उच्च सुरक्षा व्यवस्था 

इलाम । इलाममा मतपेटिका सङ्कलन गर्न थालिएको छ । इलाम नगरपालिका ७ स्थित महेन्द्र रत्न बहुमुखी क्याम्पसमा रहेको मतदान स्थलमा मतदान सम्पन्न भएको छ । मतपेटिका सङ्कलन गरी मुचुल्का तयार गर्न थालिएको  छ । 

मतगणना स्थलबाट सबैभन्दा नजिकैको दुरीमा रहेको यस मतदान स्थलमा मतपेटिका गणना स्थलमा लैजान रुजु गरि प्रक्रिया थालिएको हो । यस मतदान स्थलमा ३ हजार  १४ मतदाता रहेकोमा १ हजार ७ सय १५ मत खसेको मतदान अधिकृत किसान न्यौपानेले बताउनु भयो ।

मतगणनाको लागि स्थल तथा मतपेटिका भण्डारण स्थलको  तयारी समेत भइसकेको मुख्य  निर्वाचन अधिकृत गजुरेलले जानकारी दिनु भएको छ । सुरक्षित रुपमा मतगणना गर्न तारजाली र सिसि क्यामेरा सहित गणना स्थलको व्यवस्थापन गरिएको छ ।

इलाममा शान्तिपूर्ण रुपमा मतदान भएको   प्रमुख जिल्ला अधिकारी लक्ष्मण ढकालले बताउनु भयो । इलाममा २ अस्थायी सहित एक सय ५० मतदान स्थल र २ सय ९० मतदान केन्द्र रहेका छन् । इलाममा  १ हजार ७  सय ४० कर्मचारी खटिएको मुख्य निर्वाचन अधिकृतको कार्यालयले जनाएको छ ।

इलाममा  २ लाख ३१ हजार आठ सय नौ जना रहेका छन् । जिल्लामा २ हजार ८३६ अस्थायी मतदाता रहेका छन् । दुई निर्वाचन क्षेत्र रहेको इलाममा २७ जना उम्मेदवार चुनावी मैदानमा छन् ।