अन्तर विद्यालय टी–२० नकआउट क्रिकेट : बिकन, डिएभी र ज्ञान ज्योति मावि विजयी

वीरगञ्ज । प्याब्सन पर्साको आयोजनामा वीरगन्जमा जारी अन्तर विद्यालय टी–२० नकआउट क्रिकेट प्रतियोगिता २०८२ अन्तर्गत आज  तीन खेल सम्पन्न भएका छन् ।

आजको पहिलो खेलमा बिकन माविले ज्ञानवाटिका माविलाई ५ रनले पराजित गरेको छ । टस जितेर ब्याटिङ गरेको बिकन माविले निर्धारित ओभरमा ७ विकेटको क्षतिमा ८८ रन बनाएको थियो । लक्ष्य पछ्याएको ज्ञानवाटिका मावि पूरा ओभर खेल्दै ८ विकेट गुमाएर ८३ रनमै सीमित भयो । उक्त खेलको म्यान अफ द म्याच बिकन माविका सुमित राउत घोषित भएका छन् । 

त्यसैगरी दोस्रो खेलमा डिएभी स्कुलले मस्कोट एकेडेमीलाई ५ विकेटले पराजित गरेको छ । टस जितेर बलिङ रोजेको डिएभी स्कुलका सामु पहिले ब्याटिङ गरेको मस्कोट एकेडेमीले पूरा ओभरमा ५ विकेट गुमाउँदै ८६ रन बनाएको थियो । जवाफमा डिएभी स्कुलले ११.५ ओभरमै लक्ष्य पूरा गर्‍यो । उक्त खेलको म्यान अफ द म्याच डिएभी स्कुलका ओम कुमार द्विवेदी घोषित भएका छन् ।

आजकै तेस्रो खेलमा ज्ञान ज्योति माविले माउण्ट एडमण्डलाई ८ विकेटले पराजित गरेको छ । टस जितेर बलिङ रोजेको ज्ञान ज्योतिका अगाडि पहिले ब्याटिङ गरेको माउण्ट एडमण्डले पूरा ओभरमा ८ विकेटको नोक्सानीमा ८२ रनको लक्ष्य खडा गरेको थियो । ज्ञान ज्योति माविले उक्त लक्ष्य केवल २ विकेट गुमाउँदै ११.५ ओभरमै पूरा गर्‍यो । यस खेलको म्यान अफ द म्याच ज्ञान ज्योति माविका प्रकाश यादव घोषित भएका छन् ।