चीनको अर्थतन्त्रमा सुधारका सङ्केत तीव्र : विश्व बैङ्क

बेइजिङ । विश्व बैङ्कले बिहीबार बेइजिङमा सार्वजनिक गरेको नयाँ आर्थिक प्रतिवेदनमा चीनको सन् २०२५ को आर्थिक वृद्धि दरको पूर्वानुमान ०.४ प्रतिशत अङ्कले वृद्धि गरेको छ ।

संस्थाका अनुसार सहज सरकारी खर्च तथा मौद्रिक नीतिले घरेलु उपभोग र लगानीलाई बलियो बनाएको छ । त्यसका साथै, विकासोन्मुख मुलुकहरूबाट बढ्दो मागका कारण चीनका निर्यातमा समेत स्थिर वृद्धि देखिएको छ ।

विश्व बैङ्कका चीन, मङ्गोलिया र कोरियाका विभागीय निर्देशक मारा वारविकका अनुसार, “आगामी वर्षहरूमा चीनको आर्थिक वृद्धि मुख्यतः भित्री मागमै निर्भर रहनेछ । छोटो अवधिमा सरकारी प्रोत्साहनका साथै सामाजिक सुरक्षा प्रणालीमा संरचनात्मक सुधार गर्नु र व्यवसायका लागि भरपर्दो वातावरण सिर्जना गर्नाले समग्र अर्थतन्त्रमा विश्वास बढाउनेछ र दिगो तथा मजबुत वृद्धिको आधार तयार पार्नेछ,” उहाँले भन्नुभयो ।