गैरआवासीय नेपाली सङ्घको एकता कोशेढुङ्गा सावित हुनेछ: प्रधानमन्त्री कार्की

काठमाडौँ ।  गैर आवासीय नेपाली संघ (एनआरएन)का दुई पक्षबीच एकताको घोषणा भएको छ । प्रधानमन्त्री सुशीला कार्कीको उपस्थितिमा आज एनआरएनएका दुई पक्षबीच एकता घोषणा र १० बुँदे सहमति पत्रमा हस्ताक्षर भएको हो ।

सहमति पत्रमा ११ औँ अन्तर्राष्ट्रिय महाधिवेशनबाट निर्वाचित कार्य समितिका अध्यक्ष डा. बद्री केसी र एकताको महाधिवेशनबाट निर्वाचित कार्यसमितिका अध्यक्ष महेशकुमार श्रेष्ठले हस्ताक्षर गर्नुभएको छ ।

सहमति पत्रलाई परराष्ट्र मन्त्रालयमा अभिलिखित गर्ने र १० बुँदे सहमतिको कार्यान्वयन सङ्घको विधान अनुसार गर्ने, कुनै विषयमा विवाद उत्पन्न भए परराष्ट्र मन्त्रालयसँगको समन्वय र सहमतिमा समाधान गर्ने तथा सहमतिका सबै बुँदाहरूलाई सङ्घको आगामी १२ औँ महाधिवेशनबाट अनुमोदन गराउने सहमति पत्रमा उल्लेख गरिएको छ । 

एकता घोषणा कार्यक्रममा प्रधानमन्त्री सुशीला कार्कीले गैर आवासीय नेपाली संघका दुई वटा पक्षबीचको एकताबाट एनआरएनको इतिहासमा नयाँ आयाम थपिएको बताउनुभयो । 

प्रधानमन्त्री कार्कीले एनआरएनहरूले नेपालप्रति सद्भाव, अपनत्व देखाउँदै रोजगारीको सिर्जना गर्ने, शिक्षा, स्वास्थ्य क्षेत्र सँगै देशमा उत्पादन र उत्पादकत्व बढाउने गरी लगानी प्रवाह गर्न आग्रह गर्नुभयो । उहाँले राजनीति सङ्घको उद्देश्य बमोजिम विश्वभर छरिएर रहेका नेपालीहरूलाई एकताबद्ध बनाउने विश्वास व्यक्त गर्नुभयो । 

प्रधानमन्त्री कार्कीले एनआरएनको एकताबाट सिक्दै नेपालका राजनीतिक दलभित्र पनि मेलमिलाप, एकता र सहकार्यको आवश्यकता रहेको औँल्याउनुभयो । सञ्चार तथा सूचना प्रविधिमन्त्री जगदिश खरेलले गैर आवासीय नेपाली संघ (एनआरएन)को एकताले फुटेर हैन जुटेर अगाडी बढ्न सकिन्छ भन्ने सन्देश दिएको बताउनुभयो ।

सञ्चारमन्त्री खरेलले एनआरएनलाई पार्टीको र दलको नबनाई समग्र गैर आवासीय नेपालीहरूको साझा सङ्गठन बनाउने गरि क्रियाशील हुन सुझाव दिनुभयो ।

अन्तर्राष्ट्रिय महाधिवेशनबाट निर्वाचित कार्य समितिका अध्यक्ष डा.बद्री केसी र एकताको महाधिवेशनबाट निर्वाचित कार्यसमितिका अध्यक्ष महेशकुमार श्रेष्ठले एकता घोषणा कार्यक्रममा विगतका कमी कमजोरीहरूलाई सुधार गर्दै सम्पूर्ण गैरआवासीय नेपालीहरूको भावना अनुसार अगाडी बढ्ने प्रतिबद्धता व्यक्त गर्नुभयो ।

एकता घोषणा कार्यक्रममा  गैर आवासीय नेपाली संघका संस्थापक अध्यक्ष उपेन्द्र महतो, पूर्व अध्यक्षहरू कुमार पन्त, भवन भट्ट, संस्थापक महासचिव भिम उदासलगायतको उपस्थिति रहेको थियो ।