नरैनापुरमा विद्यालयको वास्तविक अवस्था खोजिँदै, अनुगमन सुरु

बाँके । भारतसँग सीमा जोडिएको नरैनापुर गाउँपालिकाले शिक्षामा देखिएका समस्या समाधान गर्न विद्यालय अनुगमनलाई तीव्रता दिएको छ ।

गाउँपालिका वडा नम्बर २ का वडा अध्यक्ष मसुद अहमद शाहको नेतृत्वमा सामुदायिक तथा संस्थागत विद्यालयहरूको शैक्षिक र भौतिक अवस्था मूल्यांकन सुरु गरिएको हो । अनुगमनको सुरुआत वडा नम्बर २ स्थित मदरसा सिराजिया इस्रारुल उलुमबाट गरिएको छ ।

मदरसाका प्रधानाध्यापक लाल खाँले विद्यालयको वास्तविक अवस्था बुझ्न निष्पक्ष अनुगमन सुरु हुनु सकारात्मक भएको बताउनुभयो ।

वडा अध्यक्ष शाहले पालिकाभित्रका शिक्षण संस्थाको यथार्थ अवस्था बुझ्न अनुगमन आवश्यक रहेको र क्रमशः सबै विद्यालयमा निरन्तरता दिइने जानकारी दिनुभयो ।

गाउँपालिकाका अध्यक्ष तथा शिक्षा समिति संयोजक शैयद इस्तियाक अहमद शाहले शिक्षा सुधार पालिकाको पहिलो प्राथमिकता भएको र यसका लागि विशेष समिति गठन गरिएको बताउनुभयो ।

अनुगमनमा शिक्षक दरबन्दी, नियमितता, विद्यार्थी संख्या, भौतिक पूर्वाधार, सिकाइ गुणस्तर, परीक्षा प्रणाली र व्यवस्थापन पक्षको पारदर्शितालाई प्राथमिकतामा राखिएको छ ।

शिक्षक र शिक्षा शाखाबीच हालै देखिएको आन्तरिक द्वन्द्वपछि शैक्षिक वातावरण प्रभावित बनेकाले पालिकाले अनुगमनलाई कडाइका साथ अघि बढाएको जनाएको छ ।

अनुगमनपछि विस्तृत प्रतिवेदन तयार गरी शिक्षा सुधारका लागि ठोस कार्ययोजना बनाइने वडा अध्यक्ष शाहले बताउनुभयो । नरैनापुरजस्तो सीमावर्ती क्षेत्रमा सुरु गरिएको यो पहललाई स्थानीयवासीले आशाका रूपमा लिएका छन् ।