सुधार र सुशासनका लागि प्रतिबद्ध नेतृत्व

बाँके । नेपाल विद्युत प्राधिकरण नेपालगन्ज वितरण केन्द्रमा २६ महिनासम्म नेतृत्व प्रदान गरेका कार्यालय प्रमुख इन्जिनियर जगन्नाथ लामिछाने बिदाइ भएका छन् । दिगो सुधार, पारदर्शी व्यवस्थापन र सेवा सुशासनलाई केन्द्रमा राखेर काम गर्दा उहाँको कार्यकाललाई केन्द्रको परिवर्तनकारी र स्मरणीय अवधिका रूपमा लिइएको छ ।

बिदाइ कार्यक्रममा बोल्दै इन्जिनियर लामिछानेले आफ्नो कार्यकाललाई सहकार्य, सुधार र परिणामको यात्रा भन्दै सबै कर्मचारीप्रति धन्यवाद व्यक्त गर्नुभयो । नयाँ नेतृत्वमा पनि सेवा सुधारको अभियान अझ तीव्र रूपमा अगाडि बढ्ने विश्वास उहाँले व्यक्त गर्नुभयो ।

लामिछानेको नेतृत्वमा वातानुकूलित ग्राहक प्रतिक्षालय, सुगम महसुल काउन्टर, ३३ केभीका दुई नयाँ सर्किटमार्फत कोहलपुर–नेपालगन्ज विद्युत क्षमता अभिवृद्धि, ट्रान्सफर्मर क्षमता विस्तार, आन्तरिक वितरण लाइन सुदृढीकरण, थ्री–फेज स्मार्ट मिटर विस्तार र बक्यौता असुली अभियान सञ्चालन गरिएका छन् । यी पहलले विद्युत आपूर्तिमा स्थायित्व र विश्वसनीयता बढाएको वितरण केन्द्रका लेखा अधिकृत बुद्धि सागर भुषालले बताउनुभयो ।

कर्मचारीहरूका अनुसार उहाँको नेतृत्वमा शहरीसँगै ग्रामीण क्षेत्रमा पनि विद्युत विस्तार प्रभावकारी बनेको छ । डुडुवा गाउँपालिका–१ चौफेरीसहित आधा दर्जन गाउँमा बिजुली पुर्‍याइएको उल्लेख गरिएको छ ।

लामिछानेको बिदाइसँगै नेपालगन्ज वितरण केन्द्रको नेतृत्व सहायक प्रबन्धक संजयकुमार मिश्रले सम्हाल्नुभएको छ । कर्मचारीहरूले उहाँलाई सफल कार्यकालको शुभकामना दिँदै पूर्ण सहयोग गर्ने प्रतिबद्धता जनाएका छन् ।

त्यसै अवसरमा सेवानिवृत्त कर्मचारी हरिरामलाई सम्मानपूर्वक बिदाइ तथा घोराही वितरण केन्द्रबाट बढुवा भई आएको कुन्नुकुमारी चौधरीलाई स्वागत गरिएको थियो । कार्यक्रममा विभिन्न कर्मचारी संगठनका प्रतिनिधिको पनि सहभागिता रहेको थियो ।