नेपालगञ्ज नाकाबाट एक वर्षमा ५५ लाख किलो बढी जडीबुटी निर्यात

बाँके । देशकै प्रमुख जडीबुटी निर्यात केन्द्रका रूपमा रहेको नेपालगञ्ज नाकाबाट गत आर्थिक वर्ष २०८१/८२ मा ५५ लाख किलो बढी जडीबुटी निर्यात भएको छ। पछिल्ला वर्षहरूमा निर्यातमा निरन्तर वृद्धि देखिएपछि जडीबुटी सङ्कलन तथा व्यापारमा संलग्न व्यवसायी, सङ्कलक र किसान उत्साहित बनेका छन्।

नेपाल जडीबुटी व्यवसायी सङ्घका अध्यक्ष टङ्कप्रसाद शर्माका अनुसार गत आवमा यो नाकाबाट ५५ लाख ६३ हजार ७७० किलो जडीबुटी भारतसहित तेस्रो देशमा पठाइएको हो। अघिल्लो आव २०८०/८१ मा निर्यात ४६ लाख ४९ हजार ९२९ किलो रहेकोमा यस वर्ष झण्डै ९ लाख किलोले वृद्धि भएको उल्लेखनीय प्रगति देखिएको छ।

गत वर्ष सबैभन्दा बढी निर्यात भएको जडीबुटीमा चुत्रो, रिठा, तेजपात, टिमुर, पाषाणभेद, पदम चाल, काउलोको बोक्रा, चुत्रो बोक्रा र कुटकी प्रमुख रहेका छन्। संघका अनुसार ४४ प्रकारका जडीबुटी निर्यात भएको र तीमध्ये ४२ हजार ७५० किलो जटामसी–मार्क नामक जडीबुटी दुबई र पाकिस्तानमा निर्यात गरिएको थियो।

जडीबुटी तथा यससँग सम्बन्धित अन्य उत्पादित वस्तुको निर्यात विस्तार हुँदै गएपछि पश्चिम नेपालका किसान र व्यापारीले सहजता र राहत अनुभव गरिरहेको संघका पूर्व अध्यक्ष मोहम्मद याकुब अन्सारीले बताउनुभयो।

नेपालगञ्ज भन्सार कार्यालयले पनि नेपालगञ्ज नाकाबाट बाहिरिने वस्तुहरूमध्ये जडीबुटी नै प्रमुख निर्यात सामग्री रहेको उल्लेख गर्दै वर्षेनि निर्यात परिमाण बढ्दै गएको जानकारी दिएको छ।