राजमार्ग मर्मत अवरुद्ध: चार ठेकेदारमाथि कारबाही प्रक्रिया अघि बढ्यो

बाँके। सडक डिभिजन कार्यालय नेपालगञ्ज अन्तर्गतका चार ठेकेदार कम्पनीको लापरवाहीले रत्नराजमार्ग र पूर्व–पश्चिम महेन्द्रराजमार्गका महत्वपूर्ण निर्माण तथा मर्मत योजनाहरू रोकिएका छन् । तोकिएको समयमै काम नगरेपछि सडक स्तरोन्नति तथा मर्मत कार्य प्रभावित भएको सडक डिभिजन कार्यालयका प्रमुख सीनियर डिभिजन इञ्जिनियर नरेन्द्रप्रसाद भट्टले जानकारी दिनुभयो ।

उहाँका अनुसार कोहलपुर–कर्णाली खण्डमा नियमित मर्मत, साइड ड्रेन निर्माण, सडक तथा ट्राफिक सुरक्षा कार्य, देउराली–हर्रे खण्डमा प्याचिङ तथा गमला मर्मत, हातीसार–हर्रे खण्डमा कडा फुटपाथ र नाली निर्माण, र राँझा–कोहलपुर खण्डमा रमाइन स्लरी सिलसहित सतह मर्मत समयमै हुन सकेका छैनन् ।

योजनालाई रोक्ने कम्पनीहरूमा बाँकेको एसएस निर्माण सेवा प्रा.लि., मुगुको गगन निर्माण सेवा, जाजरकोटको थापा कन्स्ट्रक्सन सेवा, र चितवन–भरतपुरको सविक निर्माण सेवा रहेका छन् । यी सबैसँग ठेक्का सम्झौता भए पनि काम सुरु नभएको सडक डिभिजन कार्यालयका सूचना अधिकारी इञ्जिनियर रामसागर हरिजनले बताउनुभयो ।

समयमै काम नगर्ने चारै कम्पनीसँग ठेक्का सम्झौता रद्द गर्ने प्रक्रिया अघि बढाइएको कार्यालयले जनाएको छ । तोकिएको समयसीमा उल्लङ्घनबारे ‘कारण देखाउ’ नोटिस पठाइएको छ ।

इञ्जिनियर भट्टका अनुसार सम्झौताअनुसार काम नगर्ने ठेकेदारविरुद्ध कडा कदम आवश्यक भएको छ । उनले पहिलो चरणमा औपचारिक स्पष्टीकरण मागिएको बताउनुभयो।

महत्त्वपूर्ण राजमार्ग स्तरोन्नति तथा मर्मत कार्य रोकिँदा स्थानीयमा असन्तुष्टि बढ्दै गएको छ ।