चालु आवको पहिलो त्रैमासमा १० जलविद्युत् आयोजनालाई निर्माण अनुमति

काठमाडौँ । चालु आवको पहिलो त्रैमासमा १० वटा जलविद्युत् आयोजनालाई निर्माण अनुमति प्रदान गरिएको छ । ती आयोजनाको कूल क्षमता दुई सय ४१ दशमलव ५० मेगावाट बराबर रहेको छ ।

विद्युत् विकास विभागले दुई सय ६६ आयोजनालाई निर्माण अनुमति पत्र प्रदान गरेको छ । ती आयोजनाको कूल क्षमता १० हजार आठ सय २५ मेगावाट रहेको विभागले उल्लेख गरेको छ ।

विभागले हालसम्म कूल एक सय ८५ आयोजनालाई सर्वेक्षणको अनुमति दिएको र ५९ वटा परियोजनाले निर्माण अनुमति पत्रका लागि आवेदन दिएको जनाएको  छ । ती आयोजनाको कूल क्षमता १० हजार पाँच सय ३२ मेगावाट बराबर छ  सौर्य परियोजनातर्फ १२ आयोजनाले निर्माण अनुमति पत्र लिएका छन् । ती आयोजनाको क्षमता ८४ मेगावाट छ । तीन वटा सौर्य परियोजनाले निर्माण अनुमति पत्रका लागि आवेदन दिएका छन् । ती आयोजनाको क्षमता १५ मेगावाट छ । निर्माण अनुमति पत्र लिए पनि काम अगाडि नबढाएका १५ आयोजनाको अनुमति पत्र खारेज गरिएको विभागले जनाएको छ ।