गण्डकीवासीलाई कार्तिक मसान्तसम्म सवारी कर तिर्दा जरिवाना नलाग्ने

कास्की। भौतिक पूर्वाधार विकास तथा यातायात व्यवस्था मन्त्रालय, गण्डकी प्रदेशले कार्तिक मसान्त भित्र सवारी कर, दस्तुर, शुल्क तिरेमा कुनै पनि जरिवाना वा अतिरिक्त शुल्क नलाग्ने बताएको छ ।

मन्त्रालयले असोज २४ गते उक्त निर्णय  गरी प्रदेश राजपत्रमा उक्त जानकारी समेटेको छ ।

२०८२ साल भाद्र २३ गते देखि २०८२ साल असोज मसान्तसम्मको अवधिभित्र गण्डकी प्रदेश आर्थिक ऐन, २०८२ को दफा ३ को सवारी कर अन्तर्गत उपदफा १ बमोजिम लाग्ने वा तिर्नुपर्ने कर, दस्तुर तथा शुल्क तिर्न नपाएका कारण जरिबाना लाग्ने भएमा २०८२ साल कार्तिक मसान्त भित्र तिर्न आएमा कुनै पनि जरिवाना वा अतिरिक्त शुल्क नलाग्ने मन्त्रालयका सचिव कमलकुमार अधिकारीले बताउनुभयो ।

छुट सहुलियत बाहेक उक्त अवधिभित्र गण्डकी प्रदेश आर्थिक ऐन, २०८२ बमोजिम लाग्ने सवारी तथा यातायात व्यवस्थापन सम्बन्धी अन्य कुनै कर, दस्तुर र शुल्क तिर्न नपाएका कारण जरिवाना लाग्ने भएमा २०८२ साल कार्तिक मसान्त भित्र तिर्न आएमा कुनै पनि जरिवाना वा अतिरिक्त शुल्क  नलाग्ने सचिव कमलकुमार अधिकारी जानकारी दिनुभयो ।