बाँकेको गाभर भ्यालीमा थारु काष्ठकला उद्योग सञ्चालन

बाँके । बाँकेको गाभर भ्यालीमा भान्साबाट उत्पन्न हुने जटिल रोगलाई कम गर्ने उद्देश्यले काठका सामग्री उत्पादन सुरु गरिएको छ। प्लास्टिकजन्य वस्तुलाई विस्थापित गर्ने हेतुले थारु काष्ठकला उद्योग स्थापना गरी चपिङ बोर्ड, अचार कुट्ने डोकनी, रोटिबेल्ने बेल्ना–चौका, मासु काट्ने अचानो लगायतका भान्सामा प्रयोग हुने सामग्री उत्पादन हुन थालेका हुन्।

गाभर होमस्टेका सञ्चालक कृष्ण चौधरीले भान्सामा प्लास्टिक चपिङ बोर्डको प्रयोगले क्यान्सरसहितका गम्भीर स्वास्थ्य समस्या निम्त्याइरहेको भन्दै यसको विकल्पका रूपमा काठका सामग्री उत्पादन थालेको बताउनुभयो। उहाँका अनुसार आयुर्वेद चिकित्सा शास्त्रमा लाभदायी मानिएका साल, जामुन, खयर र बिजयसाल जस्ता काठबाट बनाइने सामग्रीले स्वास्थ्यलाई फाइदा पुग्ने विश्वास गरिएको छ।

थारु काष्ठकला उद्योग स्थापनासँगै लुम्बिनी प्रदेशमै पहिलो पटक यस किसिमको उत्पादन सुरु भएको छ। यसले स्थानीय स्तरमा रोजगारी सिर्जना गर्नुका साथै उपभोक्तामाझ प्लास्टिकको विकल्पमा काठका वस्तु प्रयोग गर्नुपर्ने सचेतना समेत बढेको स्थानीय मिस्त्री खड्क सिंह थारुले बताउनुभयो।

वार्षिक पाँच लाखभन्दा बढी भान्सामा प्रयोग हुने काठका सामग्री उत्पादन हुँदै आएको उद्योगले स–साना काठका टुक्रा उपयोग गरेर समेत उत्पादनलाई बढवा दिएको छ। यसले वातावरणीय संरक्षणसँगै दीर्घकालीन स्वास्थ्य सुरक्षामा पनि योगदान पुर्‍याउने विश्वास गरिएको छ।

विशेषज्ञका अनुसार प्लास्टिकको चपिङ बोर्ड काट्दा उत्पन्न हुने सूक्ष्म कण खानासँगै शरीरमा प्रवेश गरी दीर्घकालीन रोग निम्त्याउने भएकाले काठका सामग्री प्रयोगमा ल्याउनुपर्ने आवश्यकता छ। गाभरमा सुरु गरिएको यस अभियानले स्वच्छ भान्सा, सुरक्षित स्वास्थ्य र हरित वातावरणलाई प्रोत्साहन गर्ने अपेक्षा गरिएको छ।