मृत्यु दर्ता बनाए पनि बेपत्ताको छानबिनमा हुन्छ : आयोग अध्यक्ष गड्तौला

बर्दिया । बेपत्ता पारिएका व्यक्तिहरूको छानबिन आयोगकी अध्यक्ष लीलादेवी गड्तौलाले सशस्त्र द्वन्द्वको क्रममा बेपत्ता पारिएका व्यक्तिहरूको परिवारले मृत्यु दर्ता गराए पनि आयोगको छानबिनमा कुनै असर नपर्ने बताउनुभएको छ । 

परिवारले बाध्यताले मृत्यु दर्ता गराएको वा न्यायिक मृत्यु घोषणा गराएको भए पनि उनीहरूको खोजबिन गरी अवस्था सार्वजनिक गर्ने बताउनुभयो ।

१५ औँ अन्तर्राष्ट्रिय बेपत्ता दिवसको अवसरमा बर्दिया पुग्नुभएकी अध्यक्ष गड्तौलाले पीडित परिवारसँग छलफलका क्रममा उजुरीको आधारमा सत्य तथ्य जाँच गरी बेपत्ताको अवस्था सार्वजनिक गर्ने बताउनुभयो । 

द्वन्द्वपीडित समिति ठाकुर बाबाकी अध्यक्ष उमा मल्लले मृत्यु दर्ता गरेका व्यक्तिको हकमा बेपत्ता आयोगले के गर्छ भनेर प्रश्न सोध्नुभएको थियो । बेपत्ता पारिएका कतिपय व्यक्तिहरूको सामाजिक सांस्कृतिक कारणले गर्दा काज किरिया गरेका छन् भने कतिपय परिवारले कानुनी बाध्यताले मृत्यु दर्ता समेत गरेका छन् ।

आयोगकी अध्यक्ष गड्तौलाले चार बर्षे अवधिमा देश भरका सम्पूर्ण बेपत्ता पारिएका व्यक्तिहरूको खोजबिन गरी अवस्था पत्ता लगाउने बताउनुभयो । उहाँले बेपत्ता पार्ने दोषी व्यक्तिहरूमाथि अभियोजन गर्ने, पीडितलाई न्याय दिलाउने र परिपूरणका लागि सरकार समक्ष सिफारिस गर्ने बताउनुभयो । 

आयोगका अनुसार बर्दियामा दुई सय ६१ ओटा बेपत्ताका उजुरी दर्ता भएका छन् नेपालभरबाट दुई हजार छ सय ४० जना बेपत्ता पारिएको भन्दै उजुरी दर्ता भएका छन् ।