खोक्सिकका विपन्न दलितलाई घर

भोजपुर I भोजपुरको रामप्रसादराई गाउँपालिका–८ खोक्सिकका छ विपन्न दलित परिवारले नयाँ घर पाएका छन् । जनता आवास कार्यक्रममार्फत आर्थिक अवस्था कमजोर भएका उनीहरुलाई घर दिइएको हो । 

राज्यले निःशुल्क घर बनाइदिएपछि दैनिकी फेरिएको लाभग्राही तीर्थादेवी कामीले बताउनुभयो । “गरिबीका कारण घर बनाउन सकेका थिएनौँ”, उहाँले भन्नुभयो, “राज्यकोतर्फबाट नयाँ घर पाउँदा खुसी छु । हाम्रो पुस्तौँदेखिको पीडा अन्त्य भएको छ ।” 

सहरी विकास तथा भवन डिभिजन कार्यालय, धनकुटाबाट आएको बजेटमार्फत घर निर्माण गरिएको वडाले जनाएको छ । वडाध्यक्ष वाचकुमार राईका अनुसार प्रत्येक घर निर्माणमा रु तीन लाख ३६ हजार खर्च भएको छ । घर निर्माणले विपन्न परिवारलाई सुरक्षित आवास र सहज जीवनयापनमा ठूलो टेवा पुगेको उहाँले बताउनुभयो । रासस