सरकारले अनुदानमा पठाएको मल व्यापारीको गोदाममा 

उदयपुर । नेपाल सरकारले अनुदानमा पठाएको मल उदयपुरको एक व्यापारीको गोदाममा भेटिएको छ ।

बिहीबार उदयपुर जिल्ला प्रशासन कार्यालयको अनुगमन टोलीले बजार अनुगमनका क्रममा जिल्लाको कटारी नगरपालिकामा अनुगमन गर्दा सरकारले पठाएको अनुदानको मल व्यापारीको गोदाममा फेला पारेको हो ।

बजारमा मलको अभाव भइरहेका बेला सरकारले किसानलाई वितरण गर्न पठाएको अनुदानको २ सय बोरा मल व्यापारीको गोदाममा लुकाइएको अवस्थामा फेला परेको  जिल्ला प्रशासन कार्यालय उदयपुरले जानकारी दिएको छ । 

जिल्लाको बजार अनुगमन टोलीले कटारी बजारका व्यापारी दिलीप चौधरीले सञ्चालन गरेको आशुतोष ट्रेडर्स एण्ड जनरल स्टोरको गोदाम अनुगमन गर्ने क्रममा सरकारले अनुदानमा पठाएको उक्त मल फेला पारेको उदयपुरका सहायक प्रमुख जिल्ला अधिकारी विक्रम प्रसाद पाण्डेयले जानकारी दिनु भयो । 

सहायक प्रमुख जिल्ला अधिकारी पाण्डेयले गोदामलाई तत्काल शिल गरी छानबिन अघि बढाइएको समेत बताउनु भयो । उहाँले भन्नु भयो, “कहाँबाट मल आएको हो ? यसमा कसको मिलेमतो छ भन्नेबारे पूर्ण छानबिन हुन्छ। पाण्डेयले आवश्यक कारबाहीका लागि कटारी नगरपालिकाका प्रमुख प्रशासकीय अधिकृतलाई निर्देशन दिइएको समेत बताउनु भयो । 

कटारी नगरपालिकाका प्रमुख प्रशासकीय अधिकृत राजन थापाले यस घटनामा संलग्नलाई कारबाही गर्न आजै छानबिन समिति गठन गरिने बताउनु भयो ।  

कटारीमा मल अभावमा भएर किसान मर्कामा परिरहेका बेला ठुलो परिणाममा सरकारी अनुदानको मल भेटिनु गम्भीर रहेको स्थानीयले बताएका छन् ।

स्थानीय व्यापारीहरूले लामो समयदेखि रासायनिक मलको अभाव देखाएर यसै बहानामा  अनुदानमा आएको मल लुकाएर कालोबजारी गरी महँगोमा बिक्री गर्ने गरेको किसानहरुले आरोप लगाएका छन् । 

स्थानीय कृषक माधव धमलाले भने, “सरकारले किसानलाई सहजै मल पुर्‍याउने नीति ल्याएको भए  पनि व्यापारीहरूले बीचमै मल लुकाएर बढी मूल्यमा मल बिक्री गर्दै आएका छन् ।” सरकारले स्थानीय सरकारको सिफारिसमा कृषि सामग्री कम्पनी र साल्ट ट्रेडिङमार्फत सहकारी संस्थामार्फत किसानलाई मल पुर्‍याउने व्यवस्था गरेको छ। तर, कटारीमा व्यापारीको गोदाममा अनुदानको मल पुग्नुले अनुदानको मलको चरम दुरुपयोग भएको देखिएको छ ।

बिहीबार जिल्ला प्रशासन कार्यालय उदयपुरले कटारीका २८ पसलमा अनुगमन गरेर म्याद गुज्रिएका सामानहरू जफत गरेको छ। अनुगमनका क्रममा करिब १ लाख २० हजार रुपैयाँ बराबरको अखाद्य तथा म्याद गुज्रिएका चामल, मसला, पेय पदार्थ, सुर्तीलगायतका सामान जफत गरी आजै नष्ट गरिएको इलाका प्रशासन कार्यालय कटारीकी प्रमुख कोपिला थुलुङ राईले जानकारी दिनु भयो। अनुगमन टोलीले कानुन विपरीत व्यवसाय सञ्चालन गरेको भन्दै स्थानीय अञ्जली पाउरोटी उद्योग र रञ्जना स्पोट्र्सलाई ५–५ हजार रुपैयाँ जरिवाना गराएको थियो ।