रुग्ण ठेक्का व्यवस्थापनबारे छलफल

काठमाडौँ । भौतिक पूर्वाधार तथा यातायात मन्त्रालयले रुग्ण ठेक्का व्यवस्थापनबारे छलफल सुरु भएको छ । 

सडक विभागको गत आर्थिक वर्षको कार्यसम्पादन समीक्षापछि रुग्ण ठेक्का व्यवस्थापन कसरी गर्ने भन्ने विषयमा छलफल भएको हो । 

मन्त्री देवेन्द्र दाहालले रुग्ण ठेक्का व्यवस्थापनलाई प्रमुख प्राथमिकता दिएको जानकारी दिनुभयो । “देशभरिका कार्यालय प्रमुखहरू काठमाडौँ आएको समय पारी मसिनो गरी रुग्ण ठेक्का व्यवस्थापनका बारेमा छलफल गरिएको हो”, उहाँले भन्नुभयो, “बजेट कार्यान्वयन गर्न उहाँहरूलाई धेरै दिन काठमाडौँमा राख्न उपयुक्त हुँदैन, त्यसैले बिदाको दिन पनि छलफल गरेका हौँ ।”

वार्षिक समीक्षा गोष्ठीमा समेत मन्त्री दाहालले रुग्ण ठेक्का व्यवस्थापन र बेरुजु फर्छ्योटलाई प्राथमिकतामा राखेर काम गर्न निर्देशन दिनुभएको थियो । आयोजनाहरू सुरु हुने तर निर्धारित समयमा नै पूरा नभई वषांैँ अलपत्र हुने अवस्थाको अन्त्यका लागि मन्त्री दाहालले कार्यभार सम्हाले देखिनै विशेष चासो राख्दै आउनुभएको छ । 

अन्य मन्त्रालय तथा कार्यालयभन्दा भौतिक पूर्वाधार तथा यातायात मन्त्रालयको कार्य क्षेत्र समेत फरक रहेका कारण बिदाका दिन अनिवार्य छुट्टी बस्ने सुविधा नहुने मन्त्रालयका सचिव केशवकुमार शर्मा बताउनुभयो । 

“सडकका कर्मचारीले १०ः०० बजेदेखि ५ः०० बजेसम्म काम गरेर पुग्दैन, जुनसुकै बेला पनि फिल्डमा खटिन तयार हुनुपर्छ”, उहाँले भन्नुभयो, “त्यसैगरी चालु आर्थिक वर्षका लागि कर्मचारीहरू कार्यालयमा जानुअघि रुग्ण ठेक्का व्यवस्थापनमा विशेष ध्यान दिँदै निकासका लागि सहजीकरण गर्न बिदाका दिन पनि काम गरिएको हो ।”

चार सङ्घीय सुपरिवेक्षण तथा अनुगमन कार्यालय तथा विभिन्न आयोजनामा रहेका रुग्ण ठेक्का व्यवस्थापनका लागि छलफल गरिएको हो । छलफलमा सडक विभागका महानिर्देशक डा विजय जैसी, उपमहानिर्देशकहरु, आयोजना प्रमुखहरू तथा विभिन्न कार्यालयका प्रमुखहरूको सहभागिता रहेको थियो ।