पृथ्वीमानले पुर्याएको योगदान महत्त्वपूर्ण छ : सभापति देउवा
चितवन । नेपाली काँग्रेसका सभापति शेरबहादुर देउवाले स्व पृथ्वीमान गुरुङले पार्टीमा त्याग, समर्पण र बलिदानी दिएको बताउनुभएको छ ।
उहाँको नवौँ दिनको पुण्य तिथिका अवसरमा नेपाली काँग्रेस चितवनले गुरुङको निवासमा आज आयोजना गरेको श्रद्धाञ्जली सभामा उहाँले गुरुङ निष्ठावान् नेता भएको बताउनुभयो ।
गण्डकी प्रदेशका पूर्वप्रमुख एवं नेपाली काँग्रेस चितवनका पूर्व सभापति गुरुङमा क्रान्तिकारीपन रहेको भन्दै सभापति देउवाले गुरुङले छोडेर गएका काम सबै मिलेर पूरा गर्नुपर्ने बताउनुभयो । उहाँले भन्नुभयो, “उहाँ मेरो पुरानो साथी हो । उहाँले छोडेर गएका काम हामी सबै मिलेर गर्नुपर्छ ।” जिल्लामा गुरुङले पुर्याएको योगदान महत्त्वपूर्ण रहेको सभापति देउवाको भनाइ थियो ।
सो अवसरमा नेपाली काँग्रेसका पूर्व उपसभापति गोपालमान श्रेष्ठले राजनैतिक यात्रा सुरु गर्दै गर्दा विश्वेश्वरप्रसाद कोइरालाले गुरुङजस्ता युवा आफूहरूसँग भएको भन्दै तारिफ गरेको स्मरण गर्नुभयो । अबको निर्वाचनमा गठबन्धन नहुने भन्दै उहाँले सबै क्षेत्रमा काँग्रेसले जित हासिल गरेर गुरुङप्रति सच्चा श्रद्धाञ्जली अर्पण गर्नुपर्ने बताउनुभयो ।
नेपाली काँग्रेसका पूर्व महामन्त्री डा शशाङ्क कोइरालाले मृत्युपछि परिचय हुने गरेको भन्दै पृथ्वीमानको इतिहास लिपिबद्ध गराउन आग्रह गर्नुभयो ।
काँग्रेस नेता मीन विश्वकर्माले गुरुङसँग काँग्रेसको निष्ठावान् चित्र र चरित्र रहेको बताउनुभयो ।
गण्डकी प्रदेशका मुख्यमन्त्री सुरेन्द्रराज पाण्डेले एक वर्ष आफूले सँगै काम गरेको स्मरण गर्दै गुरुङले आफूलाई नेता–कार्यकर्ताको शिर झुकाउन नपर्ने गरी काम गर्न सुझाव दिने गरेको बताउनुभयो ।
सो अवसरमा नेपाली काँग्रेस चितवनका सभापति राजेश्वर खनालले पूर्व सभापति गुरुङको निधनपछि पार्टीले उहाँलाई योगदानको उच्च सम्मान व्यक्त गर्दै विभिन्न कार्यक्रम गरिरहेको बताउनुभयो ।
गुरुङको यही साउन १० गते निधन भएको थियो ।
प्रतिक्रिया राख्नुहोस्