मधेस प्रदेशमा यस वर्ष हालसम्म ४७ प्रतिशत मात्र धान रोपाइँ 

जनकपुरधाम । साउनको दोस्रो साता सुरु हुँदा पनि अन्न भण्डारका रूपमा चिनिने मधेस प्रदेशमा यस वर्ष हालसम्म ४७ प्रतिशत मात्र रोपाई भएको छ । 

मनसुन अनुकूल नहुँदा धान रोपाइँ गम्भीर रूपमा प्रभावित भएको  मधेस प्रदेशका भूमि व्यवस्था, कृषि तथा सहकारी मन्त्रालयले जनाएको छ । मधेस प्रदेशमा हालसम्म ४७ प्रतिशतले धान रोपाइँ सम्पन्न भएको मन्त्रालयले जनाएको छ । 

लामो समयदेखि पर्याप्त मात्रामा पानी नपर्दा मधेस प्रदेशका  किसानहरू चिन्तित बनेका छन् । धनुषा, महोत्तरी, सिराहासहितका  जिल्लाहरूमा थोरै रोपाई भएको छ । किसानले थोरै मात्रामा नदी प्रणालीको सिँचाइमार्फत सिँचाई गरे पनि अधिकांशले मोटर, स्यालो ट्युबवेलमार्फत सिँचाई गरेका छन् । 

पानी नपर्दा किसानले लगाएका धानका ब्याड खेतमा सुक्न थालेको छ भने फाट्टफुट्ट रोपाइँ भएका खेतमा समेत धाँजा फाटेको छ ।  सबैभन्दा कम सिँचाइको अवस्था रहेको महोत्तरीको अवस्था झनै भयावह नै रहेको छ । 

नेपाल भारतको सीमानामा जोडिएको महोत्तरी जिल्लाको मटिहानीमा अत्यधिक मात्रामा मखान खेती हुने गरेको छ । अहिले मखान खेती हुने पोखरी वा जलसागरमा पानीको अभाव भएको छ । पहिला पहिला किसानले पोखरी तथा जलसागरबाट धान रोपाईका लागि पम्पीसेटमार्फत सिँचाई गर्ने गरेकोमा अहिले त्यसमा नै कमी भएपछि किसानहरू दोहोरो मारमा रहेका छन् । 

यसैबीच, मधेस प्रदेश सरकारको सिफारिसमा सङ्घीय सरकारले मधेस प्रदेशलाई तीन महिनाका लागि विपद् सङ्कटग्रस्त क्षेत्र घोषणा गरिसकेको छ । 

प्रधानमन्त्री केपी शर्मा ओलीले हिजो (शुक्रवार) मधेसको सुख्खा ग्रस्त क्षेत्रको हेलिकप्टरबाट अवलोकन गर्नुभई ५ सय डिप ट्युबवेल जडान गर्ने घोषणा गर्नुभएको छ । यसले जनतामा थोरै आस जगाए पनि शीघ्र कार्यान्वयनका लागि स्थानीयले माग गरेका छन् । 

यसका साथै ठुला सिँचाई योजनाहरू चाँडोभन्दा चाँडो निर्माण गरेर जनताको खेत खेतमा सिँचाई पुर्‍याइदिन सरकारसँग स्थानीयवासीको माग छ ।