टी–१० क्रिकेट : खुकुरी, एसियन बुद्ध र होराइजन विजयी

रुपन्देही । रुपन्देही जिल्लास्तरीय ‘एसियन बुद्ध टी–१० क्रिकेट प्रतियोगिता’ अन्तर्गत मङ्गलवार भएका तीन खेलमा लुम्बिनी खुकुरी क्रिकेट क्लब, एसियन बुद्ध र न्यू होराइजन विजयी भएका छन् ।

रुपन्देही जिल्लाको भैरहवास्थित सिद्धार्थ क्रिकेट रङ्गशालामा भएको पहिलो खेलमा लुम्बिनी खुकुरीले एक्सपर्ट क्लबलाई ८ विकेटले पराजित गरी जीत हात पारेको छ ।

टस हारेर ब्याटिङको निम्तो पाएको एक्सपर्टले ७.५ ओभरमा सबै विकेट गुमाएर जम्मा ४७ रन बनायो । जवाफी ब्याटिङ गरेको लुम्बिनी खुकुरीले ४.५ ओभरमा २ विकेट गुमाएर ५२ रन बनाउँदै सहज जीत हात पार्यो । खेलमा ४ विकेट लिएका खुकुरीका शाहब आलम प्लेयर अफ द म्याच बने ।

यस्तै, दोस्रो खेलमा एसियन बुद्धले बुद्ध क्रिकेट क्लबलाई ४९ रनले पराजित गरेको छ । टस जितेर ब्याटिङ गरेको एसियन बुद्धले ६ विकेट गुमाएर १ सय २१ रनको बलियो योगफल बनायो । जवाफी ब्याटिङ गरेको बुद्ध क्रिकेट क्लबले पुरै ओभर खेली ६ विकेट गुमाएर ७२ रन मात्रै बनायो र हार व्यहोर्यो । खेलमा ६८ रन र १ विकेट लिएका एसियन बुद्धका कृष्ण कार्की प्लेयर अफद म्याच घोषित भए ।

यस्तै, तेस्रो खेलमा न्यू होराइजनले टिम एभेन्जर्सलाई ७४ रनले पराजित गरेको छ । टस हारेर ब्याटिङ गरेको होराइजनले ५ विकेटको क्षतिमा १ सय ५ रन बनायो । जवाफी ब्याटिङ गरेको एभेन्जर्स ९.४ ओभरमा अलआउट हुँदै जम्मा ३१ रन मात्रै बनायो र हार व्यहोर्यो । खेलमा ४४ रन बनाउनुका साथै २ विकेट लिएका होराइजनका आरिफ खान प्लेयर अफ द म्याच भए ।

प्रोफेसनल मास्टर्स–११ क्रिकेट क्लब, भैरहवाको आयोजनामा सञ्चालित प्रतियोगिताको विजयी टिमले ८० नगद र उपविजेताले नगद ४० हजारसहित ट्रफी, मेडल र प्रमाणपत्र प्राप्त गर्नेछन् । 

त्यस्तै सेमिफाइनल पुग्ने दुईवटा टिमलाई नगद १०–१० हजार प्रदान गरिनेछ । आयोजकका अनुसार प्रतियोगितामा म्यान अफ द सिरिजलाई नगद रु। १२ हजार, बेस्ट ब्याटर र बलरलाई नगद ८–८ हजार, प्रत्येक खेलको म्यान अफ द म्याचलाई १ हजार दुई सय रुपैयाँ प्रदान गरिने छ । त्यस्तै उत्कृष्ट क्याच र सर्वाधिक छक्का प्रहार गर्ने खेलाडीलाई समेत समान २ हजार ५ सय तथा दर्शक दीर्घाबाट छक्का क्याच गर्ने दर्शकलाई ५ सय रुपैयाँ पुरस्कार प्रदान गरिने छ ।

प्रतियोगिताको मुख्य प्रायोजकमा भैरहवाको एसियन बुद्ध होटल रहेको छ । मौसमका कारण बीचमा एक दिन खेल नहुँदा प्रतियोगिता असार १२ गतेसम्म चल्ने भएको छ ।