राष्ट्रिय सभा बैठक: आर्थिक वर्ष २०८२/०८३ को राजश्व र व्ययको वार्षिक अनुमान बजेट माथि छलफल जारी 

काठमाडौँ । राष्ट्रिय सभाको आजको बैठकमा पनि आर्थिक वर्ष २०८२/०८३ को राजश्व र व्ययको वार्षिक अनुमान बजेट माथिको सामान्य छलफल जारी छ । 

छलफलमा सांसदहरूले आगामी वर्षको बजेटले मुलुकको आर्थिक स्थायित्वमा जोड दिएको, रणनीतिक महत्वका पूर्वाधार निर्माणका आयोजनाहरुले प्राथमिकता पाएको र निजी क्षेत्रका लगानीकर्तालाई उत्साहित बनाएको बताउनुभयो ।  

बैठकमा सांसदहरूले बजेटमा कृषिको आधुनिकीकरण र व्यवसायीकरण, पर्यटन प्रवद्र्धन, तथा युवा उद्यमशीलता र स्वरोजगारका कार्यक्रमहरूले प्राथमिकता पाउनु सकारात्मक रहेको उल्लेख गर्नुहुँदै कार्यान्वयन पक्षमा जोड दिन सरकारको ध्यानाकर्षण गराउनुभयो । 

यस्तै सांसदहरूले बजेटले अहिलेको अर्थतन्त्रको दिशानिर्देश गर्न नसकेको, विपन्न वर्गका नागरिकका दैनिक जीवनमा प्रत्यक्ष प्रभाव पार्न सक्ने लोककल्याणकारी कार्यक्रमहरूमा ध्यान दिन नसकेको र निजीकरणलाई आवश्यकता भन्दा बढी जोड दिएका कारण सुधार गरेर अगाडि बढाउन माग गर्नुभयो । 

यस अघि आजको बैठकको सुरुमा सांसदहरूले बजारमा बिक्री वितरण भईरहका तरकारी तथा फलफूलमा विषादीको परीक्षण गरी स्वच्छ र सुरक्षित फलफूल प्रयोग गर्न पाउने नागरिकको हक रक्षा गर्न सरकारको ध्यानाकर्षण गराउनुभयो । 

सांसदहरूले मानसिक समस्याका बिरामीको सङ्ख्या बढ्दै गएको हुनाले मानसिक अस्पतालहरूको स्थापना र सञ्चालनमा जोड दिन र देशभर डेंगी संक्रमाणको प्रकोप बढ्दै गएको हुनाले त्यसको नियन्त्रणका लागि प्रभावकारी कदम चाल्न ध्यानाकर्षण गराउनुभयो । 

सांसदहरूले तालिमका क्रममा कोशीमा हराइरहेका सशस्त्र प्रहरीका गोताखोरहरूको खोजिकार्यलाई तीव्रता दिन, तथा रोपाइँको सिजन सुरु हुनु अगाडिनै किसानलाई पर्याप्त रासायनिक मल र बीउ उपलब्ध गराउन ध्यानाकर्षण गराउनुभयो ।