भ्रममा नपरी देश विकासमा जुट्न ऊर्जा मन्त्री खड्काको आग्रह

सिन्धुली I ऊर्जा, जलस्रोत तथा सिँचाइ मन्त्री दिपक खड्काले विभिन्न स्तरबाट फैलाइँदै आएका अफवाह र कुप्रचारप्रति चिन्ता व्यक्त गर्दै ती भ्रममा नपरी देशको विकासमा समर्पित हुन आग्रह गर्नु भएको छ ।

सुनकोशी मरिन डाइभर्सन बहुउद्देश्यीय आयोजनाको स्थलगत अवलोकन गर्न सिन्धुली पुग्नु भएका मन्त्री खड्काले जिल्लास्थित पार्टी कार्यालयमा नेता कार्यकर्ताहरूसँगको भेटमा देशको हालको राजनीतिक, सामाजिक अवस्था र विकास रणनीतिबारे आफ्नो धारणा व्यक्त गर्नुहुँदै सो कुरा बताउनु भएको हो ।

“देशमा केही पनि नभएको होइन, धेरै काम भएका भएका छन्, केही हुँदैपनि छन्, धेरै काम गर्न सकिन्छ र गर्नु पनि पर्छ । त्यसका लागि सकारात्मक सोच र काम गर्ने इच्छाशक्ति अपरिहार्य छ,” मन्त्री खड्काले भन्नुभयो । उहाँले केही तत्त्वहरू सामाजिक सञ्जाल लगायतमा ‘हो कि हो कि’ जस्तो लाग्ने खालको हल्ला फैलाएर जनमानसमा भ्रम छर्ने प्रयास गरिरहेको उल्लेख गर्नुहुँदै यस्ता भ्रामक गतिविधिबाट सचेत रहन पार्टी कार्यकर्ता र सर्वसाधारण नागरिकलाई आग्रह गर्नुभयो ।

गृहमन्त्रीमाथि उठेका पछिल्ला विवादबारे टिप्पणी गर्दै मन्त्री खड्काले कुनै प्रमाणबिना सार्वजनिक दबाबका आधारमा राजीनामा माग्नु अव्यवहारिक रहेको धारणा राख्नुभयो । “यदि यसरी हल्लाको भरमा राजीनामा दिइयो भने बाँकी को रहन्छ र ? कानुनी प्रक्रिया नै अन्तिम निर्णायक हो,” मन्त्री खड्काको स्पष्ट भनाइ थियो।

ऊर्जा मन्त्रालयको चालु आर्थिक वर्षको बजेट र नीति कार्यक्रमबारे जानकारी गराउँदै मन्त्री खड्काले यो बजेट सन्तुलित भएको र कार्यान्वयनमा गएपछि यसको प्रभाव जनताले प्रत्यक्ष रूपमा महसुस गर्ने बताउनु भयो । उहाँले ऊर्जा क्षेत्रबाटै मुलुकमा समृद्धि हासिल हुने र गरिबी निवारण हुने बताउँदै उहाँले सरकार गरिब तथा विपन्न परिवारलाई लक्षित गर्दै बिनाधित्तो दुई लाखदेखि पाँच लाख रुपैयाँसम्मको सेयर उपलब्ध गराउने नीति ल्याएको बताउनुभयो ।

केही भएन भन्ने भाष्य सिर्जना गर्नेहरू बढेपनि यथार्थ त्यो भन्दा फरक रहेको बताउनु भयो । उहाँले मेरै कार्यकालमा क्षेत्रीय ऊर्जा व्यापारतर्फ नेपालले उल्लेखनीय सफलता हासिल गर्दै बङ्गलादेशसँग ४० मेगावाट विद्युत् बिक्री शुरु गरिएको बताउनुभयो । अब भारतसँग १० हजार र बङ्गलादेशलगायत तेस्रो मुलुकसँग ५ हजार गरी १५ हजार मेगावाट विद्युत् निर्यात गर्ने सुनिश्चितता कायम भएको बताउनुभयो । यसले देशको आर्थिक सबलीकरणमा टेवा पुर्‍याउने विश्वास व्यक्त गरे।

समाजमा बढ्दो असन्तोष, निराशा र हल्लाका कारण उत्पन्न नकारात्मक वातावरणप्रति गम्भीर चिन्ता व्यक्त गर्दै मन्त्री खड्काले संयमित भएर आफू मात्रलाई नभई आफ्ना सन्तानको भविष्यसमेत हेरेर देश निर्माणको अभियानमा जुट्न आह्वान गरे। “समाजलाई भड्किन नदिऔँ, देश बनाउने अरू होइन, हामी आफैँ हौँ,” मन्त्री खड्काको अपिल थियो।

पार्टी कार्यालयमा आयोजित सो कार्यक्रम नेपाली कांग्रेस सिन्धुलीका जिल्ला उपसभापति दीपक कुमार घिमिरेको अध्यक्षतामा सम्पन्न भएको थियो। कार्यक्रममा नेपाली कांग्रेस संसदीय दलकी सचेतक सांसद सुनिता थिङ, जिल्ला पार्टीका पूर्वसभापति मोहन प्रसाद बराल, उज्ज्वल बराललगायत नेताहरूको उपस्थिति रहेको थियो।