हीरक महोत्सवका अवसरमा प्रभातफेरी कार्यक्रमको आयोजना

काठमाडौँ I सार्वजनिक सेवा प्रसारण नेपाल, रेडियो नेपालले आफ्नो ७५औँ वार्षिकोत्सव तथा हीरक महोत्सवका अवसरमा आज प्रभातफेरीको आयोजना गरेको छ ।

रेडियो नेपालको केन्द्रिय कार्यालय सिंहदरबारबाट सुरु भएको प्रभातफेरी माइतीघर मण्डला, भद्रकाली, पुतलीसडक, न्यूप्लाजा, अनामनगर र हनुमानस्थान हुँदै रेडियो नेपालको प्राङ्गणमा पुगेर समापन भयो । 

कार्यक्रममा सार्वजनिक सेवा प्रसारण नेपालका कार्यकारी अध्यक्ष डा.महेन्द्र बिष्टले  सार्वजनिक सेवा प्रसारणको उद्देश्य अनुरुप रेडियो नेपाल र नेपाल टेलिभिजनले आफ्ना कामहरू अगाडि बढाउनुपर्नेमा जोड दिनुभयो ।

रेडियो नेपाल र नेपाल टेलिभिजन सार्वजनिक सेवा प्रसारणमा रूपान्तरण भएसँगै  त्यसको मर्म अनुसार पहिलो चरणका क्रियाकलापहरू अगाडि बढिसकेको र यसलाई निरन्तरता दिँदै पिएसवीको उद्देश्य प्राप्तिका लागि सबैलाई उत्साहपूर्वक काम गर्न आग्रह गर्नुभयो ।

सार्वजनिक सेवा प्रसारण नेपाल सञ्चालक समितिका सदस्य अनिता गुरुङ, निमित्त प्रमुख प्रशासकीय अधिकृत विष्णुराम न्यौपाने, नायव कार्यकारी निर्देशक खगेन्द्र खत्री र निमित्त नायव कार्यकारी निर्देशक पुष्करराज गौतमले सार्वजनिक सेवा प्रसारण नेपालका कामहरूलाई प्रभावकारी ढङ्गबाट अगाडि बढाउन सबै कर्मचारीहरू दत्तचित्त भएर लाग्नुपर्ने धारणा राख्नुभयो ।

प्रभातफेरीमा सार्वजनिक सेवा प्रसारण नेपालका कर्मचारी हरुको सहभागिता रहेको थियो ।

हीरक महोत्सवका अवसरमा रेडियो नेपालले सप्ताहव्यापी विभिन्न कार्यक्रमहरू आयोजना गर्दै आएको छ ।

यस अवसरका स्वास्थ्य परिक्षण, रेडियो नेपालको लोगो अंकित हुलाक टिकटमा टाँचा लगाउने, राष्ट्रव्यापी खुला आधुनिक गीत सङ्गीत प्रतियोगिता लगायतका कार्यक्रमहरू यसअघि नै सम्पन्न भइसकेको छ ।

तस्बिर: मिलन ढुङ्गाना