वरिष्ठ पत्रकार तथा राजनीतिज्ञ कमल कोइरालाको निधन

काठमाडौं । वरिष्ठ पत्रकार, अगुवा राजनीतिक व्यक्तित्व र कूटनीतिज्ञ कमल कोइरालाको ८७ वर्षको उमेरमा निधन भएको छ। गत मंगलबार लडेर पक्षघात भएपछि सिनामंगलस्थित केएमसी अस्पतालमा भर्ना गरिएका कोइरालाको आइतबार उपचारकै क्रममा राति ९ बजे निधन भएको उहाँकी छोरी ऋचा कोइरालाले जनाउनुभएको छ।

कमल कोइराला पूर्वप्रधानमन्त्री मातृकाप्रसाद कोइरालाका छोरा हुनुहुन्थ्यो । कोइराला परिवारका एक मात्र कम्युनिस्ट नेताका रूपमा परिचित कमल पार्टी कामसँगै पत्रकारितामा पनि समानान्तर रूपमै सक्रिय हुनुहुन््थ्यो । उहाँले ०४७ पछि एमालेनिकट दृष्टि साप्ताहिकको प्रधानसम्पादकको जिम्मेवारी सम्हाल्नुभएको थियो । त्यसपछिका वर्षहरूमा उहाँले रोडम्याप साप्ताहिकको प्रधानसम्पादकको भूमिका पनि निभाउनुभयो । उहाँ पछिल्लो समय साँघु साप्ताहिक र जनआस्थासहितका विभिन्न अखबारमा स्तम्भकारका रूपमा सक्रिय लेखनमा हुनुहुन्थ्यो। बुधबार साप्ताहिकमा पनि उहाँले लामो समयसम्म स्तम्भकारको रूपमा कार्य गर्नुभएको थियो।

कमल कोइराला ०५१ सालको मध्यावधि निर्वाचनमा मोरङ ६ बाट प्रतिनिधिसभा सदस्य निर्वाचित हुनुभएको थियो। उहाँले करिब तीन वर्ष दक्षिण कोरियामा नेपाली राजदूतको जिम्मेवारी पनि सम्हाल्नुभएको थियो । उहाँ एमालेका पूर्वकेन्द्रीय सदस्य र पूर्वसल्लाहकारसमेत हुनुहुन्थ्यो। पार्टी विभाजनपछि भने उहाँ नेकपा एकिकृतसमाजवादीमा आबद्ध हुनुभएको थियो ।